|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 74 Hüküm no: 23 Orijinal metin no: [12-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Mustafa b. Şaban’ın evini Ahmed b. Bünyad’a sattığı
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin el-Hâc Mustafa b. Şaban nâm kimesne meclis-i şer‘-i hatîr-i lâz[ımü’t-tevkīrde] işbu râfi‘ü’l-kitâb Ahmed b. Bünyad nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı tarîk-i âm ve üç tarafı Mustafa Bey b. Abdullah nâm kimesne mülkü ile mahdûd olup bir bâb fevkānî ve bir bâb tahtânî beyti ve kenîfi ve tûlen yedi buçuk zirâ‘ ve arzan altı buçuk zirâ‘ muhavvatayı müştemil olan mülk menzilimi mezbûr Ahmed’e fıddî-i Osmânî râyic fi’l-vakt ( ) [bey‘-i] bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd [13] eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil merkūm Ahmed’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe [tahkīk] edicek mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe sene semânin ve selâsin ve elf.
Şuhûdü’l-hâl: Mahmud Çelebi [b.] Mehmed es-Serrâc, Süleyman Efendi [b.] Mirza, Mahmud Bey [b.] Mirza el-Cündî, Mustafa Halîfe [b.] Server el-İmâm, Ömer Bey b. Mustafa, Yakub Bey [b.] Aydın? serrâc, Mehmed b. Mirza, Mehmed b. Abdullah, Bâli b. Ahmed, Ramazan b. Mehmed ve gayruhüm
|