|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 74 Hüküm no: 24 Orijinal metin no: [13-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Cuvan v. İstefan’ın tasarrufundaki icâreteynli vakıf bahçeyi mütevellînin izniyle Derviş Beşe b. Süleyman’a devrettiği
Mahmiye-i Galata’da sâkin Cuvan v. İstefan nâm zimmî mahfil-i kazâda işbu râfi‘ü’l-kitâb Derviş Beşe b. Süleyman nâm bostancı mahzarında ikrâr ve takrîr-i kelâm edip merhûm Turşucuzâde Hüseyin Çelebi Vakfı’ndan olup Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde vâki‘ bir tarafında Hammâmî Mehmed Çelebi mülkü ve bir tarafdan Turhan Bey mülkü ve bir tarafdan vâdi ve tarîk-i âm ile mahdûd büyût-ı müte‘addideyi ve su kuyusunu ve eşcâr-ı müsmire ve gayr-ı müsmireyi hâviye bahçeyi müştemil olup icâre-i mu‘accele ve sene[de] altı yüz akçe icâre-i müeccele ile tasarrufumda [olan] vakıf menzili vakf-ı mezbûr mütevellîsi Abdurrahman Çelebi ma‘rifetiyle merkūm Derviş Beşe’ye fâriğ olup mukābele-i ferâğda yedinden on beş bin nakd-i râyic fi’l-vakt alıp ba‘de’l-yevm zikr olunan bahçe merkūm Derviş Beşe’nin taht-ı tasarrufundadır ba‘de’l-yevm cânib-i vakf-ı mezbûra ta‘yîn olunan senede altı yüz akçeyi edâ edip mutasarrıf ola dedikde mezbûr Cuvan’ın takrîr-i meşrûhunu merkūm Derviş Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe li sene semânin ve selâsin ve elf.
Şuhûdü’l-hâl: Süleyman Efendi b. Mirza, Mustafa Efendi [b.] Ramazan, Mahmud Çelebi [b.] Mehmed es-Serrâc, Kasım Bey [b.] Abdullah serrâc, Mehmed Halîfe [b.] Haydar el-Müezzin, İbrahim Çelebi [b.] Hüsrev, Mustafa Çelebi [b.] Mehmed serrâc, Hızır b. Abdullah, Mehmed b. Mustafa, Mehmed Beşe [b.] Abdünnebi, Mustafa b. Mehmed ve gayruhüm
|