|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 75 Hüküm no: 26 Orijinal metin no: [14-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İsak v. İlya’nın evini Ahmed Ağa b. Mehmed’e sattığı
Havâss-ı aliyye kazâsına tâbi‘ Hasköy nâm karye[de] sâkin olup Tire cemâ‘atinden İsak v. İlya nâm Yahudi meclis-i şer‘-i şerîf-i lâzımü’t-teşrîfde hâlen Dergâh-ı âlî mahfûfen bi’l-me‘âlî kapıcıbaşı olan fahrü’l-emâcid ve’l-ekârim câmi‘ü’l-mehâsin ve’l-mekârim Ahmed Ağa b. Mehmed mahzarında bi’t-tav‘i’s-sâf ikrâr ve i‘tirâf edip hâlen silk-i mülkümde muntazam olup karye-i mezbûrede vâki‘ bir cânibi Dimitri v. Kosta mülkü ve bir cânibi lebideryâ ve bir cânibi Azil nâm Yahudi arz-ı hâliyesi ve bir cânibi tarîk-i âm ile mahdûd ve mümtâz olup kapı üstünde bir bâb fevkānî odayı ve bir hamamı ve hamam üstünde bir bâb odayı ve bir matbahı ve matbaha muttasıl bir bâb ocaklı odayı ve yine deryâ kurbunda vâki‘ bir bâb fevkānî odayı ve bir şehnişîni ve bir sofayı ve bir bâb ocaklı oda ve iki oda mâbeyninde dehlizi ile bir sofayı ve bir bâb tahtânî çamaşırhâneyi ve bir mahzeni ve iki su kuyusunu ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilimi cümle tevâbi‘i ve levâhıkı ile mûmâ-ileyh Ahmed Ağa’ya tâmmü’l-vezn sahîhü’l-ayâr bin beş yüz kâmil guruşa bey‘-i bâtt-ı sahîh-i şer‘î ile bey‘ edip kabz-ı semen edip ol dahi vech-i meşrûh üzre iştirâ ve tesellüm ettikden sonra semen olan merkūmü’l-mikdâr bin beş yüz mezbûru’n-na‘t riyâlî guruşu müşârun-ileyh Ahmed Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i merkūm müşârun-ileyh Ahmed Ağa’nın mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunda el-mu[karru leh] merkūm Ahmed Ağa dahi vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Saferi’l-hayr sene 1039.
Şuhûdü’l-hâl: Süleyman Efendi b. Mirza el-İmâm, Durmuş Bey b. Salih el-Cündî, Mahmud Çelebi [b.] Mehmed serrâc, Mustafa Çelebi b. Halil serrâc, Hüseyin Bey [b.] Mehmed serrâc, Ömer Bey [b.] Mustafa serrâc, Sefer Bey b. Kadri, Hasan Bey b. Hüseyin el-Cündî, Mustafa Çelebi b. Mehmed serrâc, Ahmed Çelebi b. Mustafa, Mahmud Bey [b.] Mirza el-Cündî, İbrahim Beşe er-Râcil, Halil Bey el-Cündî, Mustafa b. Mehmed, Mustafa Ağa b. Ali üstâd, Mihal v. Yani, ( ) v. ( ), Aristos v. ( ), İsrâyil v. Hayem, Besalel v. Besalel, Kemal v. Yako, Angeli v. Mavro ( )
|