|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 76 Hüküm no: 27 Orijinal metin no: [15-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Gazal v. Dader’in bağını Ferhad v. Şahbaz’a bey‘ bi’l-vefâ yoluyla sattığı
Vilâyet-i Anadolu’da vâki‘ kasaba-i Eğin’de sâkin Gazal v. Dader nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ferhad v. Şahbaz nâm Ermeni muvâcehesinde bi’t-tav‘i’s-sâf ikrâr ve takrîr-i kelâm edip kasaba-i mezbûrede vâki‘ bir tarafı Cihanşah bağı ve bir tarafı karındaşım Hacik bağı ve bir tarafı Şahbaz bağı ve bir tarafı vâdi ile mahdûd ve mümtâz olan mülk bağımı cümle tevâbi‘i ve levâhıkı ile târih-i kitâbdan sene-i kâmile gāyetine müeccel [olmak] üzre bey‘ bi’l-vefâ tarîk[i] ile mezbûr Ferhad’a kâmil riyâlî yüz guruşa bey‘ edip kabz-ı semen ve teslîm-i mebî‘ eyledim sene tamâmında meblağ[-ı mezbûr] yüz riyâlî guruşu yedine edâ eylediğimde zikr olunan bağ benim mülküm olup târih-i mezbû[r] tamâmında meblağ-ı mezbûru yedine teslîm eylemezsem mezbûr Ferhad’ın mülkü olmak üzre bey‘ tarîki ile bey‘ eyledim dedikde mukırr-ı merkūmun ikrâr-ı meşrûhunu el-mukarru lehü’l-mezbûr Ferhad bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Saferi’l-hayr sene 1039.
Şuhûdü’l-hâl: Mustafa Beşe [b.] Abdullah, Cuvan v. Fedi, Hayem v. Anberşah, Serkis v. Ağanes, Mikayil v. Mercan, Agop [v.] Kirakoz, Arzhan v. Malo
|