|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 76 Hüküm no: 28 Orijinal metin no: [15-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Efendi b. Abdi’nin evini Âişe bt. Muslu’ya sattığı
Havâss-ı aliyye kazâsı muzâfâtından el-Hâc Şaban mahallesinde sâkin Mehmed Efendi [b.] Abdi el-İmâm meclis-i şer‘-i hatîr-i lâzımü’t-tevkīrde işbu râfi‘atü’l-kitâb Âişe bt. Muslu mahzarında bi’t-tav‘i’s-sâf ikrâr ve i‘tirâf edip mahalle-i mezkûrede vâki‘ bir tarafı Ali mülkü ve iki tarafı Mustafa Beşe bahçesi ve bir tarafı tarîk-i âm ile mahdûd ve mümtâz olup iki bâb beyt-i süflîyi ve eşcâr-ı müsmire ve gayr-ı müsmireyi müştemil olan mülk menzilimi mezbûre Âişe’ye fıddî-i Osmânî râyic fi’l-vakt üç bin sekiz yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil mezbûre Âişe’nin mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Recebi’l-ferd sene tis‘în ve selâsin ve elf.
Şuhûdü’l-hâl: Mustafa Efendi b. Ramazan, Ali Beşe b. Hasan, Osman Beşe b. Abdullah, Ali Beşe b. Ahmed er-Râcil, Murad b. Abdullah, Mustafa b. Mehmed, Mehmed Beşe b. Abdünnebi, Mustafa Çelebi b. Halil es-Serrâc
|