|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 77 Hüküm no: 29 Orijinal metin no: [16-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yahudi ailenin arsalarını Ahmed Ağa b. Mehmed’e sattıkları
Mahmiye-i İstanbul’da sâkin Yahudi tâ’ifesinden olup Mesine cemâ‘atinden Gavril v. Yasef ve karındaşı İsak ve kız karındaşı Râbiye ve vâlidesi Sabatiye nâm Yahudiler meclis-i şer‘-i hatîr-i lâzımü’t-tevkīrde işbu râfi‘ü’l-kitâb hâlen Dergâh-ı âlî mahfûfen bi’l-me‘âlî kapıcıbaşısı olan fahrü’l-emâcid ve’l-ekâbir câmi‘ü’l-mehâsin ve’l-mekârim Ahmed Ağa b. Mehmed nâm kimesne mahzarında her biri bi’t-tav‘i’s-sâf ikrâr ve i‘tirâf eyleyip Havâss-ı aliyye kazâsına tâbi‘ Hasköy’de vâki‘ bir tarafı mûmâ-ileyh Ahmed Ağa mülkü ve bir tarafı lebideryâ ve bir tarafı Mavrodi mülkü ve taraf-ı râbi’-i tarîk-i âm ile mahdûd ve mümtâz olan arz-ı hâliyemizi merkūm Ahmed Ağa’ya kâmil riyâl[î] beş yüz guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledik ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan arz-ı hâliye merkūm Ahmed Ağa’nın mülk-i müşterâsıdır keyfemâ yeşâ ve yehtâr mutasarrıf olsun dediklerinde mukırrûn-ı merkūmûnun minvâl-i muharrer üzre sudûr ve zuhûr eden ikrâr ve i‘tirâflarını el-mukarru lehü’l-merkūm bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Şevvâli’l-mükerrem sene 1039.
Şuhûdü’l-hâl: Mustafa Efendi b. Ramazan el-hâce, Kasım Bey [b.] Abdullah serrâc, İbrahim Beşe [b.] Ali, Mahmud Bey [b.] Mirza, Ömer b. Mustafa serrâc, Yusuf Bey [b.] Hüseyin serrâc, Mahmud Çelebi [b.] Mehmed serrâc, el-Hâc Ahmed [b.] Abdullah, Yahya Çavuş ve gayruhüm
|