.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 78
Hüküm no: 30
Orijinal metin no: [16-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Arakil v. Panek’in aldığı borç karşılığında Eğin’deki emlâk hisselerini kardeşi Kazir’e rehin verdiği

Vilâyet-i Anadolu’da Arapgir sancağında Eğin kazâsında sâkin Arakil v. Panek nâm Ermeni meclis-i şer‘-i şerîf-i lâzımü’t-teşrîfde li ebeveyn karındaşı Kazir nâm Ermeni mahzarında bi’t-tav‘i’s-sâf ikrâr ve i‘tirâf edip alâ tarîki’l-karzı’ş-şer‘î mezbûr Arakil yedinden kâmil riyâlî elli guruş alıp zimmetimde lâzımü’l-edâ ve vâcibü’l-kazâ deynimdir dedikden sonra kazâ-i mezbûrede vâki‘ bir tarafı Cuvan v. Fedi bağı ve bir tarafı Pağmi bağı ve bir tarafı Horak bağı ve bir tarafı tarîk-i âm ile mahdûd ve mümtâz olan bir kıt‘a irs-i şer‘î ile intikāl eden hisse-i şâyi‘amı ve yine kazâ-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan mülk menzilden hisse-i şâyi‘amı meblağ-ı mezbûr için merkūm [17] Kazir yedine rehin vaz‘ eyledim dedikde mukırr-ı merkūmun ikrâr-ı meşrûhun el-mukarru lehü’l-mezbûr Kazir bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Saferi’l-hayr li sene erba‘în ve elf.


Şuhûdü’l-hâl: Muslu Beşe b. Abdullah, Mehmed Beşe b. Abdünnebi, Latef v. Serkis, Tanol v. Latef, Arzhan v. Serkis, Serkis v. Ağanes, Cuvan v. Fedi