.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 78
Hüküm no: 31
Orijinal metin no: [17-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Ali’nin evini Pîr Veli’ye sattığı

Havâss-ı aliyye kazâsı muzâfâtından Hasköy mahallâtından Keçeciler mahallesinde sâkine Fâtıma bt. Ali nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Pîr Veli b. ( ) mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Hüseyin b. Abdülkerim mülkü ve bir tarafı Mustafa Bey b. ( ) serbölük mülkü ve bir tarafı Mehmed b. Ali mülkü ve bir tarafı tarîk-i âmma muttasıl olan menzili fevkānî ve tahtânî iki bâb odayı ve müşterek bi’r-i mâ’ı ve tûlen on bir zirâ‘ ve arzan altı zirâ‘ kenîfe muttasıl eşcâr-ı müsmireye değin menzil-i mahdûdu mezbûr Pîr Veli’ye altı bin akçeye bey‘-i bâtt-ı sahîh-i şer‘î ile bey‘ edip semen olan meblağ-ı mezbûru merkūm Pîr Veli’nin yedinden bi’t-tamâm ahz u kabz eyledim ba‘de’l-yevm menzil-i mezkûr merkūm Pîr Veli’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhasını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilevvel li sene erba‘în ve elf.


Şuhûdü’l-hâl: ( )