.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 79
Hüküm no: 32
Orijinal metin no: [17-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Receb Halîfe b. Hüsam’ın Gülistan bt. Abdullah adlı câriyesini azat ettiği

Mahmiye-i İstanbul’da Gül Câmi‘i mahallesinde sâkin Receb Halîfe b. Hüsam nâm el-Müezzin meclis-i şer‘-i hatîr-i lâzımü’t-tevkīrde câriye-i memlûkesi olan uzun boylu açık kaşlı kara gözlü sol elinde haç alâmeti olan Abaziyyetü’l-asl Gülistan bt. Abdullah nâm câriye-i memlûkesinin muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î edip câriye-i memlûkem olan mevsûfe-i mezkûreyi bi-niyyetin hâlisatin vâfiretin ve taviyyetin tayyibetin sâfiye ile hasbeten lillâhi’l-hallâk tahrîr ve i‘tâk edip mâlımdan âzâd ve ihrâc ve silk-i ahrâr-ı asliyyîne indirâc eyledim ba‘de’l-yevm mezbûr Gülistan sâir ahrâr-ı asliyyîn gibi hürre olup sâir mevâlî için şer‘an sâbite olan hakk-ı velâdan gayrı hakkım kalmadı dedikde gıbbe’t-tasdîki’l-vicâhî mâ hüve’l-vâki‘ [18] bi’t-taleb ketb olundu. Tahrîren fi’l-yevmi’l-ışrîn min Cumâdelûlâ sene 1040.


Şuhûdü’l-hâl: Es-Seyyid Mustafa Efendi b. es-Seyyid Yunus el-kadı, İbrahim Çelebi b. Abbas el-İmâm, Mustafa Ağa b. Ali el-üstâd, Veli Bey [b.] Abdullah er-Râcil, el-Hâc İsmail, Hamza Subaşı [b.] Ali, Ahmed Çelebi er-Râcil, el-Hâc Hilmi b. Mehmed, Mustafa b. Mehmed, Osman Çavuş [b.] Abdullah ve gayruhüm