|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 80 Hüküm no: 35 Orijinal metin no: [19-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Bey b. Mirza’nın ev, mahzen ve kahvehâneyi Salamon v. Yasef’e kiraladığı
Havâss-ı aliyye kazâsına tâbi‘ Hasköy mahallâtından Pî[rî] Paşa mahallesinde sâkin Mahmud Bey b. Mirza el-Cündî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Salamon v. Yasef nâm Yahudi muvâcehesinde ikrâr ve takrîr-i kelâm edip mahalle-i mezbûre iskelesinde vâki‘ lede’l-ahâlî ve’l-cîrân ma‘lûmü’l-hudûd olup silk-i mülkümde münselik fevkānî dört bâb odayı ve fevkānî mahzeni ve tahtânî mahzeni ve bir kahvehâneyi mezbûr Salamon’a târih-i kitâbdan sene tamâmına değin dört bin üç yüz otuz üç akçeye îcâr ol dahi istîcâr ettikden sonra yedi yüz otuz üç akçe mu‘accelen edâ edip bâkī kalan üç bin altı yüz akçe mâ[h] be mâh üçer yüz akçe edâ etmek üzre îcâr ol dahi istîcâr eyledi dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek sene 1040.
Şuhûdü’l-hâl: Mehmed Çelebi [b.] Me[h]med serrâc, Süleyman Efendi [b.] Mirza, Hüseyin Bey [b.] Mehmed serrâc, Mustafa Çelebi [b.] Halil serrâc, Ömer Bey [b.] Mustafa serrâc, Mehmed b. Haydar el-Müezzin, Pîrî b. Rıdvan, Kasım Bey [b.] Abdullah, Ali Beşe [b.] Ahmed er-Râcil, Durmuş Bey b. Salih el-Cündî, Manehal? v. Salamon, İsak [v.] Mosi, Durdu [b.] Turhan ve gayruhüm
|