|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 81 Hüküm no: 36 Orijinal metin no: [19-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Bey b. Mirza’nın evini kardeşi Mehmed Bey’e sattığı
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin fahrü’l-akrân Mahmud Bey b. Mirza nâm cündî meclis-i şer‘-i hatîr-i lâzımü’t-tevkīrde işbu râfi‘ü’l-kitâb karındaşı Mehmed Bey nâm serbölük mahzarında bi’t-tav‘i’s-sâf ikrâr ve i‘tirâf edip mahalle-i mezbûrede bir tarafı Çerçi Himmet mülkü ve bir tarafı Hasan Vakfı ve bir tarafı Ömer Çelebi ve bir tarafı Yakub Beşe mülkü ile mahdûd ve mümtâz olup iki bâb fevkānî menzilimi ve iki bâb tahtânî menzilimi ve bi’r-i mâ’ı ve [20] ve eşcâr-ı müsmire ve gayr-ı müsmireyi müştemil olan mülk menzilimi mezbûr Mehmed Bey’e fıddî-i Osmânî râyic fi’l-vakt yedi bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil mezbûr Mehmed Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehül-mezbûr Mehmed Bey bi’l-muvâcehe tasdîk ve bi’l-müşâfehe tahkīk [edicek] mâ hüve’l-vâki‘ bi’t-taleb ketb olundu. Tahrîren fî evâsıtı Ramazâni’l-mübârek sene erba‘în ve elf.
Şuhûdü’l-hâl: Mahmud Çelebi [b.] Me[h]med serrâc, Mustafa Çelebi [b.] Halil serrâc, Ömer b. Mustafa, Kasım Bey [b.] Abdullah, Ahmed [b.] Hüseyin, Mehmed b. Mustafa, Ahmed [b.] Muslu, Yusuf Bey [b.] Hüseyin serrâc, Mustafa b. Mustafa ve gayruhüm
|