|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 81 Hüküm no: 37 Orijinal metin no: [20-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yasef v. David ve kardeşi Yahuda’nın mülk bağlarını Kostantin v. Andriye’ye sattıkları
Havâss-ı aliyye kazâsına tâbi‘ Hasköy’de sâkin olup Aragon cemâ‘atinden Yasef v. David ve karındaşı Yahuda nâm Yahudiler meclis-i şerîf-i lâzımü’t-teşrîfde işbu râfi‘ü’l-kitâb Kostantin v. Andriye nâm zimmî mahzarında bi’t-tav‘i’s-sâf ikrâr ve i‘tirâf edip karye-i mezbûre kurbunda Kağıthâne nâm mevzi‘de vâki‘ bir tarafı Kostantin v. Andriye bağı ve bir tarafı Todori [v.] İspolot ve bir tarafı arz-ı hâliye ve bir tarafı vâdi ile mahdûd ve mümtâz olup tahmînen on üç dönüm bir kıt‘a mülk bağımı cümle tevâbi‘ ve levâhıkı ile mezbûr Kostantin’e râyic fi’l-vakt dört bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan bir kıt‘a bağ mezbûr Kostantin’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Kostantin bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Şevvâli’l-mükerrem sene 1040.
Şuhûdü’l-hâl: Mahmud Çelebi b. Mehmed es-Serrâc, Hüseyin Bey b. Memi es-Serrâc, Mehmed Halîfe b. İbrahim el-Müezzin, Ali Beşe b. Abdullah, Papa Yani ( ), Aristos v. Yani, Mihal v. Yani, Kostantin v. Manohi, Sahak? v. İstenko
|