|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 82 Hüküm no: 38 Orijinal metin no: [21-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Cuvan v. Fedi’nin Rus asıllı Anna bt. Martık adlı câriyesini azat ettiği
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Cuvan v. Fedi nâm Ermeni meclis-i şer‘-i şerîf-i lâzımü’t-teşrîfde abd-i memlûkü olan bâ‘isü’l-kitâb orta boylu açık kaşlı gök gözlü sarışın Rûsiyyetü’l-asl Anna bt. Martık nâm câriye mahzarında bi’t-tav‘i’s-sâf ikrâr ve i‘tirâf [edip] câriye-i memlûkem olan mevsûfe-i mezkûreyi bi-niyyetin hâlisatin vâfiyetin ve taviyyetin tayyibetin sâfiye ile hasbeten lillâhi’l-hallâk tahrîr-i i‘tâk edip mülkümden âzâd ve ihrâc ve silk-i ahrâr-ı asliyyîne indirâc eyledim ba‘de’l-yevm mezbûre Anna sâir ahrâriye-i asliyyîn gibi olup sâir mevâlî için şer‘an sâbit olan hakk-ı velâdan gayrı hakkım kalmadı dedikde gıbbe’t-tasdîk olıcak mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm sene ihdâ ve erba‘în ve elf.
Şuhûdü’l-hâl: Süleyman Efendi b. Münir, Mustafa Çelebi b. Hasan serrâc, Mehmed Çelebi b. Ahmed, Süleyman Bey b. Abdullah serrâc, Ali Beşe b. Abdullah, Mehmed b. Mustafa ve gayruhüm.
|