|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 82 Hüküm no: 39 Orijinal metin no: [21-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rıdvan Bey b. Abdullah’ın evini Hüseyin Bey b. Nasuh’a sattığı
Havâss-ı aliyye kazâsı muzâfâtından Hasköy mahallâtından el-Hâc Şaban mahallesinde sâkin Rıdvan Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hüseyin Bey b. Nasuh mahzarında bi’t-tav‘i’s-sâf ikrâ[r] ve i‘tirâf edip mahalle-i mezbûrede vâki‘ bir tarafı Mehmed Beşe b. ( ) mülkü ve bir tarafı Ali b. Abdülcebbâr mülkü ve bir tarafı Sâime bt. Rıdvan nâm Hâtun mülkü ve bir tarafı tarîk-i âm ile mahdûd ve mümtâz olan iki bâb menzilimi ve bir bâb ahırı ve bi’r-i mâ’ı ve eşcâr-ı müsmire ve gayr-ı müsmireyi müştemil olan mülk menzilimi mezbûr Hüseyin Bey’e nakd-i râyic fi’l-vakt on dokuz bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil-i mezbûr Hüseyin Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Hüseyin Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel sene ihdâ ve erba‘în ve elf.
Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed serrâc, Hüseyin Bey b. Mehmed es-Serrâc, Mehmed Halîfe b. Haydar el-Müezzin, Mustafa Çelebi b. Halil es-Serrâc, Ahmed Bey b. Hüseyin serbölük, Ali Beşe b. Ahmed er-Râcil, Ömer Bey b. Mustafa es-Serrâc, Sinan Bey b. Mehmed es-Serrâc, Halil Çelebi b. Mehmed er-Râcil ve gayruhüm.
|