.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 83
Hüküm no: 40
Orijinal metin no: [21-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Bey b. Nasuh’un evini Rıdvan Bey b. Abdullah’a sattığı

Havâss-ı aliyye kazâsına tâbi‘ Hasköy mahallâtından Turşucu mahalle[sinde] sâkin Hüseyin Bey b. Nasuh nâm cündî meclis-i şer‘-i şerîf-i lâzımü’t-teşrîfde işbu râfi‘ü’l-kitâb Rıdvan Bey b. Abdullah nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Ferhad (…) ve bir tarafı İbrahim Ağa bahçesi ve bir tarafı (…) [22] ve bir tarafı tarîk-i âm ile mahdûd iki bâb tahtânî menzilimi ve bahçeyi ve kenîfi ve muhavvatayı müştemil olan mülk menzilimi mezbûr Rıdvan Bey’e râyic fi’l-vakt sekiz bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan [menzil] merkūm Rıdvan Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Rıdvan Bey bi’l-muvâcehe tahkīk edicek mâ hüve’l-vâki‘ bi’t-taleb ketb olundu. Tahrîren [fî] evâili Rebî‘ilevvel sene ihdâ ve erba‘în ve elf.


Şuhûdü’l-hâl: Ahmed Efendi [b.] Abdi el-İmâm, Mahmud Çelebi [b.] Mehmed Bey, Hüseyin Bey b. Mehmed es-Serrâc, Mehmed Halîfe [b.] Haydar el-Müezzin, Mustafa Çelebi serrâc, Ahmed Bey b. Hüseyin serbölük, Ali Beşe [b.] Ahmed Beşe er-Râcil, Ömer Bey b. Mustafa serrâc, Sinan Bey b. ..? es-Serrâc, Ömer Bey b. Hüseyin, Halil Çelebi [b.] Mehmed es-Serrâc, Mustafa Beşe [b.] Lütfi