|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 84 Hüküm no: 42 Orijinal metin no: [23-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rus asıllı Gülistan adlı câriyenin vefat eden Hatice bt. Behram tarafından azat edildiğinin sabit olduğu
Havâss-ı aliyye kazâsı muzâfâtından Hasköy mahallâtından Turşucu mahallesinde sâkine iken fevt olan Hatice bt. Behram nâm hâtunun câriye-i memlûkesi olan işbu bâ‘isetü’l-kitâb o[r]ta boylu açık kaşlı sarışın Rûsiyyetü’l-asl Gülistan bt. Abdullah nâm câriye, meclis-i şer‘-i hatîr-i lâzımü’t-tevkīrde müteveffât-ı mezbûrenin zevci Mustafa Beşe b. Abdullah nâm râcil mahzarında üzerine takrîr-i da‘vâ edip ben müteveffâ-yı mezbûrenin câriye-i memlûkesi olup beni hâl-i hayâtında ve kemâl-i sıhhatinde hasbeten lillâhi’l-hallâk tahrîr ve i‘tâk etmiş idi hâlen sâir ahrâr-ı asliyyîn gibi hürre olmuşken mezbûr Mustafa Beşe bana vaz‘-ı yed eder suâl olunup yed-[i] kasr olunmasını taleb ederin dedikde, gıbbe’s-suâl mezbûr Mustafa Beşe [müdde‘î-yi] mezbûru inkâr edicek müdde‘iye-i merkūmeden da‘vâsına mutâbık beyyine taleb olundukda udûl-i müslimînden olup karye-i mezbûre sükkânından Hasan b. Hüseyin nâm kimesne Kamer bt. Nasuh (…) nâm hâtunlar li ecli’ş-şehâde meclis-i şer‘a hâzırûn olup fi’l-hakīka müteveffâ-i mezbûre hâl-i hayâtında ve kemâl-i sıhhatinde câriye-i memlûkesi olan mevsûfe-i mezkûreyi hasbeten lillâhi’l-hallâk tahrîr ve i‘tâk etmişdi hâlen merkūme Gülistan sâir ahrâr-ı asliyyîn gibi hürredir biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olup merkūme Gülistan’ın ıtkına hükm olu[nu]p mâ hüve vaka‘a bi’t-taleb ketb [olundu]. Tahrîren fî evâhiri Cumâdelâhire sene 1041.
Şuhûdü’l-hâl: ( )
|