|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 84 Hüküm no: 43 Orijinal metin no: [23-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rus asıllı Gülistan adlı câriyenin azat edildiğinin şahitlerle ispatı
Havâss-ı aliyye kazâsı muzâfâtından Hasköy mahallâtından Turşucu mahallesi sükkânından olan Hasan b. Hüseyin nâm kimesne ile Kamer bt. Nasuh ve Kâmile bt. Abdullah nâm hâtunlar tağyîr ve tahrîfden korunmuş olan meclis-i şer‘-i şerîf ve mahfil-i dîn-i münîfde i‘tâk ve tahrîr-i âti’z-zikre hasm-ı şer‘î-i câhid olup bundan akdem mahalle-i mezbûrede sâkine iken vefât eden Hatice bt. Behram nâm hâtunun zevci ve vârisi olan Mustafa Beşe b. Abdullah mahzarında hâzır olup hâfızet-i hâze’l-kitâb orta boylu küçük elâ gözlü Rûsiyyetü’l-asl müslimetü’l-mille Gülistan bt. Abdullah tarafından sâdır olan da‘vâ-yı sahîh-i şer‘îde gıbbe’l-istişhâdi’l-mesbûk müteveffât-ı mezbûre hâl-i hayâtında ve kemâl-i akl ü sıhhatinde bizim huzûrumuzda kendisine rıkkıyetini mu‘terife olan mevsûfe-i mezbûre Gülistan’ı hasbeten lillâhi’l-aliyyi’l-azîm ve taleben li merdâti’r-Rabbi’r-rahîm i‘tâk ve tahrîr-i sahîh-i şer‘î ile âzâd ve tahrîr etti deyû edâ-i şehâdet-i sahîha-i şer‘iyye ettiklerinde şehâdetleri makbûle olmağın [24] mûcebiyle hükm olunarak câriye-i mezbûrenin âzâdına hükm-i sahîh-i şer‘î ile hükm olundu. Cerâ zâlike ve hurrire fi’l-yevmi’s-sâdis ve’l-ışrîn min Cumâdelâhire li sene ihdâ ve erba‘în ve elf.
Şuhûdü’l-hâl: İbrahim Halîfe b. Hüsrev el-İmâm, Mehmed Halîfe b. Haydar el-Müezzin, Mehmed b. Kasım el-Müezzin, Ahmed Bey b. Abdullah ve gayruhüm
|