|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 85 Hüküm no: 44 Orijinal metin no: [24-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Behmen b. Abdullah’ın kıyıdaki kayıkhanesini vakfetmesi
Elhamdü li veliyyihî ve’s-salâtü alâ Nebiyyihî Muhammedin ve âlihî ve sahbihî ecma‘în ammâ ba‘d. İşbu kitâb-ı sıhhat nisâb ve müşkin-nikābın tahrîr ve tasdîrine bâ‘is ve bâdî oldur ki Havâss kazâsına tâbi‘ Hasköy demekle ma‘rûf karye sâkinlerinden el-Hâc Behmen b. Abdullah nâm kimesne meclis-i şer‘-i şerîf-i lâzımü’t-teşrîfde ikrâr ve i‘tirâf edip karye-i mezbûrede sâhil-i bahrda bir tarafı Ömer Bey mülkü ve bir tarafı Sinan Paşa Vakfı ve bir tarafı tarîk-i âm ve bir tarafı bahr ile mahdûd silk-i mülk-i sahîh ve sımt-ı hakk-ı tasarrufumda dâhil iki pereme yerini hasbeten lillâhi’l-aliyyi’l azîm ve haseneten li rûhi’l-kerîm vakf-ı sahîh-i şer‘î ve habs-i sarîh-i mer‘î ile vakf ve habs edip şöyle şart eyledim ki zikr olunan pereme yerini îcâr olunup ücretinden her ne hâsıl olursa karye-i mezbûrede vâkıf-ı mezbûr? Turşucuzâde Hüseyin Çelebi Câmi‘-i şerîfi imâmı mutasarrıf olup mukābelesinde yevmî her gün ba‘de’z-zuhr Sûre-i Mülk ve üç İhlâs-ı şerîf tilâvet edip sevâbın rûhuma hibe eyleye ve mahalle-i mezbûre ahâlîsi hasbî [nâzır] olalar deyip vech-i merkūm üzre vakf ve şart ve kaydını bast ve temhîd edip li ecli’t-tescîl mütevellî nasb ettiği câmi‘ imâmı İbrahim Halîfe b. Hüsrev’e teslîm eyledim deyip mütevellî-i mezbûrdan kabz ve tesellüm ve sâir evkāf mütevellîleri gibi tasarrufuna mukır ve mu‘terif oldukdan sonra vâkıf-ı mezbûr ebniye ve akārın vakfiyyeti İmâm-ı A‘zam Hazretleri yanında câ’iz değildir deyû istirdâd edip yedini kasr eylesin deyû sadr-ı kitâbda tevkī‘-i müstetâbı vâki‘ olan hâkim-i hâsim huzûrunda murâfa‘a olduklarında mütevellî-i mezbûr vakf-ı akār İmâmeyn mâbeynlerinde husûsan ba‘de’t-teslîm ile’l-mütevellî vakıf kıbelindendir İmâmeyn-i hümâmeyn re’y-i şerîfleri üzre vakfiyyetin sıhhatine hükm olunmasın taleb ederin dedikde hâkim-i müşârun-ileyh -esbağallâhu ni‘amehû aleyh- cânib-i vakfı evlâ ve ecrâ görüp İmâmeyn-i hümâmeyn re’y-i şerîfleri üzre akār-ı merkūmun vakfiyyetinin sıhhatine hükmedip min ba‘d vakıf üzre mü’eyyed ve habs-i sarîh-i mü’ekked olup mütevellî mahzarında tescîl olunup mâ vaka‘a bi’t-taleb ketb olundu. Cerâ zâlike ve hurrire fi’l-yevmi’t-tâsi‘ ve’l-ışrîn min Cumâdelâhire sene 1041. [25] [Şuhûdü’l-hâl:] Mehmed Halîfe b. Haydar el-Müezzin, Durmuş Bey b. Salih Cündî, Kasım Bey b. Abdullah es-Serrâc, Süleyman Bey b. Abdullah es-Serrâc, Ahmed Bey b. Abdullah, Ahmed Bey b. Habbâz, Hüseyin Bey b. Mehmed es-Serrâc, Mehmed b. Mustafa, el-Hâc Ramazan b. Mahmud
|