|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 86 Hüküm no: 45 Orijinal metin no: [25-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Beytülmâle isabet eden hissenin vefat eden Zeyneb’in mirasından alındığı
Havâss-ı aliyye kazâsına tâbi‘ Hasköy’de bi’l-fi‘il beytülmâl emîni olan fahrü’l-akrân Hüseyin Bey b. ( ) nâm cündî mahfil-i kazâda işbu râfi‘ü’l-kitâb Himmet b. Pürkadem nâm kimesne mahzarında takrîr-i kelâm edip bundan akdem zevcesi Zeyneb bt. ( ) nâm hâtun fevt olup muhallefâtının nısfına vaz‘-ı yed edip zâhirde vâris-i ma‘rûfu olmamağla emânetim hasebiyle mezbûrenin muhallefâtından beş yüz akçe isâbet edip meblağ-ı mezbûru tehârüc-i şer‘î tarîkle mezbûr Himmet’in yedinden tamâmen ahz u kabz eyleyip husûs-ı mezbûra müte‘allik de‘âvî ve husûmât ve mutâlebât ve eymândan mezbûrun zimmetini ibrâ-i âm ile ibrâ ve ıskāt-ı tâm ile ıskāt eyledim ba‘de’l-yevm benden bi’l-asâle ve bi’l-vekâle da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Recebi’l-mürecceb sene 1041.
Şuhûdü’l-hâl: Mustafa Efendi b. Ramazan, Ahmed Efendi b. Abdi el-İmâm, Ali Beşe b. Hüseyin, Ali Beşe [b.] Abdullah, Bayram b. Veli ve gayruhüm.
|