|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 86 Hüküm no: 46 Orijinal metin no: [25-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kamer bt. Yahya’nın vefat eden kocası Bâli b. Ahmed’de kalan mehir alacağının ödenmesi
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin iken bundan akdem fevt olan Bâli b. Ahmed’in zevce-i metrûkesi Kamer bt. Yahya nâm hâtun meclis-i şer‘-i hatîr-i lâzımü’t-tevkīrde merhûm-ı mezbûrun sulbî kebîr oğlu Yahya mahzarında üzerine takrîr-i da‘vâ edip zevcem merhûm-ı mezbûr zimmetinde mehr-i müeccelden on iki bin akçe hakkım bâkī kalıp vermede te‘allül eder suâl olunup alıverilmesin taleb ederim dedikde, gıbbe’s-suâl mezbûr Yahya mikdârü’l-mezbûr akçe mehr-i müecceli olunduğunu inkâr edicek müdde‘iye-i mezbûreden da‘vâsına mutâbık beyyine taleb olundukda udûl-i müslimînden olup Mahmiye-i İstanbul’da Çırakçı Hasan mahallesi sükkânından Rıdvan b. Ali ve Hasan b. Abdullah nâm kimesneler li ecli’ş-şehâde meclis-i şer‘a hâzırân olup fi’l-hakīka bizim huzûrumuzda mezbûre Kamer mezbûr-ı merkūm Bâli’ye on iki bin akçe mehr-i müeccel ile nikâh olundu biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle oldukdan sonra gıbbe’l-istihlâf mezbûre Kamer’e meblağ-ı mezbûru merhûm-ı merkūm Bâli’den almadığına yemîn billâhi’l-aliyyi’l-azîm ettikden sonra meblağ-ı mezbûru mezbûre Kamer’e edâya merkūm Yahya’ya [tenbîh olundukda mâ vaka‘a] [26] bi’t-taleb ketb olundu. Tahrîren fî evâili Şa‘bâni’l-mu‘azzam li sene ihdâ ve erba‘în ve elf.
Şuhûdü’l-hâl: Ömer Bey b. Mustafa es-Serrâc, Mustafa Halîfe b. Surûrî el-İmâm, Mehmed b. İbrahim el-Müezzin, Hamza b. İsmail, Ali b. Abdullah.
|