|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 87 Hüküm no: 47 Orijinal metin no: [26-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bedros v. Hacik’in Eğin’deki emlâkini Kirakoz v. Şahbaz’a bey‘ bi’l-vefâ yoluyla sattığı
Vilâyet-i Anadolu’da Eğin kazâsına tâbi‘ Gemürgâp [nâm] karyede sâkin Bedros v. Hacik nâm Ermeni meclis-i şer‘-i hatîr-i lâzımü’t-tevkīrde Kirakoz v. Şahbaz nâm Ermeni mahzarında bi’t-tav‘i’s-sâf ikrâr ve i‘tirâf eyleyip karye-i mezkûrede vâki‘ bir tarafı Asvador v. İskender bağı ve bir tarafı Nevrûz v. Lastof bağı ve iki tarafı tarîk-i hâs ile mahdûd ve mümtâz iki bâb menzilimi ve yine karye-i mezbûrede vâki‘ Maşrağ Bağı demekle ma‘rûf bir tarafı Narez v. Nevrûz bağı ve bir tarafı tarîk-i mâ’ ve bir tarafı tarîk-i âm ve bir tarafı Bızdık bahçesi ile mahdûd ve mümtâz olan mülk bağımı ve yine karye-i mezbûrede vâki‘ Çerboğ Bağı demekle ma‘rûf bir tarafı tarîk-i âm ve bir tarafı Serkis bağı ve bir tarafı Gülazu v. Ferhad bağı ve bir tarafı tarîk-i âm ile mahdûd ve mümtâz olan bir kıt‘a mülk bağımı ve yine karye-i mezbûrede vâki‘ Nazer v. Nevrûz mülkü ve bir tarafı Asvador v. İskender mülkü ve bir tarafı Gülazu v. Murad mülkü ve bir tarafı Gazal mülkü ile mahdûd ve mümtâz olan iki bâb fevkānî ve bir bâb tahtânî mülk menzilimi safka-i vâhide ile kâmil üç yüz riyâlî guruşa bey‘ edip kabz-ı semen-i ma‘dûd ve teslîm-i mebî‘-i mahdûd kıldıkdan sonra târih-i kitâbdan bir sene-i kâmile gāyetinde meblağ-ı mezbûru edâ eylese mebî‘-i merkūm yine mülküne avdet etmek üzre beyinlerinde akd ve lâzımü’l-vefâ vâki‘ olmuşdur dedikde, gıbbe’t-tasdîk akd-i mezbûr lafz-ı bey‘ ile akd olunup bi-şart-ı vefâ bey‘de zikr olmayacak câ’iz vefâ’-i mezbûr, dîn-i e’imme-i müctehidîn -rıdvânullâhi aleyhim ecma‘în- mezheb-i şerîfleri üzre hâkim-i muvakki‘-i sadr-ı kitâb sâ’ibe-i? rehniyet bertaraf oldukdan sonra akdûn-ı mezbûrûnun in‘ikādına hüküm birle mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek sene 1041.
Şuhûdü’l-hâl: ( )
|