|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 88 Hüküm no: 48 Orijinal metin no: [26-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kudruş v. Âzer’in evini Ahmed Beşe b. Osman Efendi’ye sattığı ve satış bedelini babasının borcu ile takas ettikleri
Vilâyet-i Anadolu’da kasaba-i Eğin’de sâkin Kudruş v. Âzer nâm Ermeni meclis-i şer‘-i hatîr-i lâzımü’t-tevkīrde işbu [bâ‘isü]’l-kitâb Ahmed Beşe b. Osman Efendi mahzarında bi’t-tav‘i’s-sâf ikrâr ve i‘tirâf edip kasaba-i mezbûrede vâki‘ bir tarafı Cuvan v. Canik mülkü ve bir tarafı Honek v. Yakob mülkü ve bir tarafı Ağba v. Ağanes mülkü ve bir tarafı Asvador v. Sefer mülkü ile mahdûd ve mümtâz olan mülk menzil yerimi mezbûr Ahmed Beşe’ye kâmil riyâlî otuz guruşa bey‘-i bâtt-ı sahîh-i şer‘î ile bey‘ edip [27] ettiğimden sonra, meblağ-ı mezbûru müşterî-i mezbûrun merhûm yine babamın zimmetinde cihet-i karzdan kırk beş riyâlî hakkı olup mikdârü’l-mezbûr kırk beş riyâlî guruşun otuz riyâlî guruş hakkına takas eyledim, ba‘de’l-yevm zikr olunan menzil yeri merkūm Ahmed Beşe’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Ahmed Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Ramazâni’l-mübârek sene 1041.
Şuhûdü’l-hâl: Mustafa Beşe b. Abdullah cebeci, Serkis v. Agop, Hanem v. Anberşah, Serkis v. Ağanes, Manik v. Anberşah
|