|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 88 Hüküm no: 49 Orijinal metin no: [27-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vakfa borçlu olarak vefat eden Emine Hâtun’un evinin müzâyede ile Divan kâtibi Mehmed Efendi’ye satıldığı
Havâss-ı aliyye kazâsı muzâfâtından Hasköy mahallâtından Ahmed Çelebi mahallesinde sâkine iken fevt olan Emine bt. ( ) nâm hâtunun verâseti zevc-i metrûku Mehmed Bey b. Mehmed ve sadriye sagīr oğlu Ali’ye ve sadriye kebîre kızı Fâtıma’ya münhasıra olduğu şer‘an mütehakkik oldukdan sonra mezbûre Fâtıma asâleten ve mezbûr Mehmed Bey kendi tarafından asâleten ve sagīr-i mezbûrun tesviye-i umûruna vasîyy-i muhtârı olmağla vesâyeten mahfil-i kazâda Dîvân-ı hümâyûn kâtiblerinden kıdvet-i erbâbü’t-tahrîr ve’l-kalem Mehmed Beşinci Efendi b. Atâullâh mahzarında her biri ikrâr ve takrîr-i kelâm edip merhûme-i mezbûre medyûneten vefât edip nukūd ve menkūlünden mahalle-i mezbûrede vâki‘ bir cânibi Atâullâh mülkü ve bir cânibi Mehmed Bey b. Hürmüz bağı ve bir cânibi İbrahim Paşa mülkü ve bir cânibi tarîk-i âm ile mahdûd olup iki bâb fevkānî ve iki tahtânî beyti ve kapı üstünde bir bâb odayı ve ıstablı ve hadîka-i zât-ı eşcâr-ı müsmireyi ve gayr-ı müsmireyi müştemil olan mülk menzilinden gayrı deynine vefâ eder mâlı olmayıp karye-i mezbûrede merhûm Turşucu Vakfı’na olan dokuz bin akçe deyn-i müsbeti için menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra menzil-i mezbûr sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mezbûr Mehmed Beşinci Efendi üzerinde otuz bin nakd-i râyic fi’l-vakt akçede karâr edip ve ziyâde ile tâlib-i âhar zuhûr etme[me]ğin menzil-i mezbûru vesâyeten mûmâ-ileyh Mehmed Beşinci Efendi’ye zarûret-i deyn-i merkūm için merkūmü’l-mikdâr [28] otuz iki bin akçeye bey‘-i kat‘î ile bey‘ eyleyip ol dahi vech-i mübeyyen üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eyledik dediklerinde, gıbbe’t-tasdîki’l-vicâhî mezbûr Mehmed Bey i‘âde-i kelâm edip müstakillen silk-i mülkümde muntazam yine menzil-i mezbûra muttasıl lede’l-ahâlî ve’l-cîrân ma‘lûmü’l-hudûd olan tahmînen bir dönüm mülk bağımı dahi müşârun-ileyh Mehmed Efendi’ye on bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr on bin akçeyi mûmâ-ileyh Mehmed Beşinci Efendi yedinden bi’t-tamâm ahz u kabz eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem li sene ihdâ ve erba‘în ve elf.
Şuhûdü’l-hâl: Yusuf Bey b. ( ) el-Cündî, Mehmed Halîfe el-Müezzin, Abdurrahman Çelebi el-mütevellî, Ahmed Bey el-Cündî, Mahmud Ağa el-Cündî, Mehmed Çelebi, Mahmud Çelebi b. Mehmed es-Serrâc, Ahmed Çelebi b. Mustafa, Hüseyin b. Ali, Mehmed b. Mehmed.
|