|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 89 Hüküm no: 50 Orijinal metin no: [28-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mircan v. Evrenk’in Eğin’deki bağını borcu karşılığında Ferhad v. Şahbaz’a rehin verdiği
Vilâyet-i Anadolu’da Arapgir Sancağı’na tâbi‘ Eğin kazâsında sâkin Mircan v. Evrenk nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ferhad v. Şahbaz nâm Ermeni mahzarında bi’t-tav‘i’s-sâf ikrâr ve takrîr-i kelâm edip kazâ-i mezbûrede vâki‘ bir tarafı Bolhin’in arz-ı hâliyesi ve bir tarafı Berhüdâr bağı ve bir tarafı Mirek bağı ve bir tarafı mâ’-ı cârî ile mahdûd ve mümtâz olan bir kıt‘a mülk bağımı mezbûr Ferhad’a bi-tarîki’l-karzı’ş-şer‘î kâmil yüz on riyâlî guruşa müeccelen aleyh deynim olup târih-i kitâb şehri gurresinde yüz elli güne değin müeccel olup yüz elli gün tamâmında zimmetimde lâzımü’l-edâ ve vâcibü’l-kazâ deynimdir dedikden sonra meblağ-ı mezbûr deyni olan kâmil yüz on riyâlî guruş için mezbûr Ferhad yedine rehin vaz‘ eyledim dedikde mukırr-ı merkūm Mircan’ın ikrâr-ı meşrûhunu el-mukarru lehü’l-mezbûr Ferhad bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene ihdâ ve erba‘în ve elf.
Şuhûdü’l-hâl: Mustafa Beşe b. Abdullah, Ali b. Abdullah, Cuvan v. Fedi, Serkis v. Ağanes, Serkis v. Latef, Halaser v. ( ), Asuzader v. Sefer, Ferhoza? v. Horbek, Hayem v. Safer, Alonek? v. Tatek?
|