.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 90
Hüküm no: 51
Orijinal metin no: [29-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Bey b. Nasuh’tan miras kalan evin vârislerince Mehmed b. Abdullah’a satıldığı

Medîne-i Hazret-i Ebâ Eyyûb el-Ensârî muzâfâtından Hasköy mahallâtından el-Hâc Şaban mahallesinde sâkin iken fevt olan Hüseyin Bey b. Nasuh’un verâsetini ammisi oğlu Abdülgaffâr Bey b. Nefs’e ve zevce-i metrûkesi Âişe bt. Hasan nâm hâtuna münhasıra olduğu şer‘an mütehakkik oldukdan sonra mezbûrân Abdülgaffâr ve Âişe mahfil-i kazâda işbu râfi‘ü’l-kitâb Mehmed b. Abdullah nâm kimesne mahzarında bi’t-tav‘i’s-sâf ikrâ[r] ve takrîr-i kelâm edip merhûm-ı mezbûrun muhallefâtından olup mahalle-i mezbûrede vâki‘ bir tara[fı] Himmet b. ( ) mülkü ve bir tarafı Ali b. Abdülcebbâr mülkü ve bir tarafı Sâime bt. Rıdvan mülkü ve bir tarafı tarîk-i âm ile mahdûd ve mümtâz olan iki bâb fevkānî menzilimi ve bir bâb ahırı mezbûr Mehmed’e nakd-i râyic fi’l-vakt yirmi iki bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledikde ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan menzil-i mezbûr Mehmed Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırrân-ı merkūmânın ikrâr-ı meşrûhunu el-mukarru lehü’l-mezbûr bi’l-muvâcehe tasdîk bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren [fî] evâhiri Şevvâli’l-mükerrem sene ihdâ ve erba‘în ve elf.


Şuhûdü’l-hâl: Ahmed Efendi b. Abdi el-İmâm, Durmuş Bey [b.] Salih el-Cündî, Mahmud Çelebi [b.] Mehmed es-Serrâc, Mustafa Çelebi [b.] Halil serrâc, Ali b. Hasan, Ahmed Bey [b.] Mehmed serbölük, Ahmed Çelebi [b.] Muslu, Mehmed Beşe [b.] Veli, Süleyman b. Ali, Mehmed Bey [b.] Mehmed, İlyas [b.] Mehmed ve gayruhüm.