|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 90 Hüküm no: 52 Orijinal metin no: [29-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Kaya’nın evini Latef v. Serkis’e sattığı
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkine Fâtıma bt. Kaya nâm Hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Latef v. Serkis nâm Ermeni mahzarında bi’t-tav‘i’s-sâf ikrâr ve i‘tirâf edip mahalle-i mezkûrede vâki‘ bir tarafı Mehmed Bey b. Mehmed mülkü ve bir tarafı Mavrodi mülkü ve bir tarafı Kasım Bey b. Abdullah mülkü ve bir tarafı Mehmed Bey nâ[m] cündî mülkü ile mahdûd ve mümtâz olan bir bâb fevkānî ve bir bâb tahtânî odayı müştemil olan mülk menzilimi mezbûr Latef’e râyic fi’l-vakt on beş bin akçeye bey‘-i bâtt-ı sahîh-i şer‘î ile bey‘ edip [kabz-ı semen-i ma‘dûd] [30] ve teslîm-i mebî‘-i mahdûd eyledim ba‘de’l-yevm zikr olunan menzil mezbûr Latef’in mülk-i müşterâsıdır keyfemâ yeşâ ve yehtâr mutasarrıf olsun dedikde merkūmenin ikrâr-ı meşrûhu[nu] el-mukarru lehü’l-mezbûr Latef bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene ihdâ ve erba‘în ve elf.
Şuhûdü’l-hâl: İbrahim Bey [b.] Yusuf el-Cündî, Durmuş Bey b. Salih el-Cündî, Hüseyin Bey [b.] Mehmed es-Serrâc, Ahmed Bey b. Murad el-Cündî, Mehmed Beşe [b.] Ali, Kasım Bey b. Abdullah serrâc, İlyas [b.] Mehmed, Hüseyin Beşe [b.] Yusuf, Mehmed Halîfe [b.] Haydar el-Müezzin, Hasan b. Rıdvan
|