|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 91 Hüküm no: 53 Orijinal metin no: [30-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Beşe b. Abdullah’ın evini Mâhi bt. Abdi’ye sattığı
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Mehmed Beşe b. Abdullah meclis-i şer‘-i hatîr-i lâzımü’t-tevkīrde işbu râfi‘atü’l-kitâb Mâhi bt. Abdi nâm hâtun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Derviş b. Mehmed mülkü ve bir tarafı Baroh nâm Yahudi mülkü ve iki tarafı tarîk-i hâs ile mahdûd ve mümtâz olan üç bâb tahtânî büyûtu ve sofayı ve su kuyusu ve hadîka-i zât-ı eşcâr-ı müsmire ve gayr-ı müsmireyi müştemil mülk menzili mezbûre Mâhi’ye nakd-i râyic fi’l-vakt on iki bin akçe[ye] bey‘-i bâtt-ı sahîh-i şer‘î ile bey‘ edip [kabz-ı] semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan menzil mezbûre Mâhi’nin mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūm Mehmed Beşe’nin ikrâr-ı meşrûhunu el-mukarru leha’l-mezbûre Mâhi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene 1041.
Şuhûdü’l-hâl: Ahmed Efendi [b.] Abdi el-İmâm, Ali b. Hasan, Ali [b.] Hüseyin, Hasan [b.] Uğurlu, İbrahim [b.] İsmail, Ramazan [b.] Mustafa, Ahmed [b.] İlyas, Mustafa Çelebi [b.] Halil serrâc, Hüseyin [b.] Ahmed, Ali Beşe [b.] Ahmed serrâc
|