|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 91 Hüküm no: 54 Orijinal metin no: [30-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Arastos v. Yani’nin evini zevcesi Belayuna bt. Mavridi’ye sattığı
Havâss-ı aliyye kazâsına tâbi‘ Havâss mahallesinde sâkin Arastos v. Yani nâm zimmî mahfil-i kazâda işbu râfi‘ü’l-kitâb zevcesi Belayuna bt. Mavridi nâm zimmîyye mahzarında ikrâr ve i‘tirâf edip mahalle-i mezbûrede vâki‘ fevkānî bir odayı ve deryâ tarafında karındaşım Mihayil’e mülâsık menzilimin nısf-ı şâyi‘ini ve tahtlarında olan mahzenleri ve bir sofayı ve bi’r-i mâ’ı müştemil olup bahr tarafında [31] tahmînen yedi buçuk zirâ‘ ve tarîk tarafında beş buçuk zirâ‘ yeri ile bir cânibi kendi mülküm ve bir tarafı mezbûr karındaşım Mihayil’in mülküne ve bir tarafı sâhil-i bahra ve bir tarafı tarîk-i âm ile mahdûd ve mümtâz olan mülk menzilimi mezbûre Belayuna’ya bey‘-i bâtt-ı sahîh-i şer‘î ile altmış bin fıddî râyic fi’l-vakt akçeye bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm menzil-i mahdûd mezbûre Belayuna’nın mülk-i müşterâsıdır keyfemâ yeşâ ve yehtâr mutasarrıfa olsun dedikde mukırr-ı mezbûr ikrâr-ı meşrûhunda bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem sene ihdâ ve erba‘în ve elf.
Şuhûdü’l-hâl: Mehmed Efendi el-İmâm, Mustafa Efendi, Mahmud Çelebi serrâc, Mustafa Çelebi serrâc, Mehmed Hoca el-Müezzin, Ali Dede, Ali Beşe [b.] Abdullah, Kara Hasan Dede, Mahmud Ağa [b.] Emirze, Mustafa Çelebi [b.] Emirze, Mehmed Çelebi [b.] Ahmed, Mehmed Ağa [b.] Abdullah, İbrahim Efendi el-İmâm, Süleyman Efendi el-İmâm, Mehmed Bey [b.] Abdullah, Himmet [b.] Mehmed, Hristo v. Mihal, Aleksandri v. Toma, Yani Bıyıklı, Zodoriye?, Dido v. Yani, Kemal, Menekşe.
|