|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 93 Hüküm no: 57 Orijinal metin no: [32-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Derviş Mehmed b. Abdülcebbâr’ın yetim kızının nafakası için evinin satılması
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin iken fevt olan Derviş Mehmed b. Abdülcebbâr nâm kimesnenin verâseti zevce-i metrûke[si] Saadet bt. Abdi ve sagīr[e] kızı Ümmühânî’ye münhasıra olduğu şer‘an mütehakkik oldukdan sonra mezbûre Saadet kendi tarafından asâleten ve kızı sagīre-i mezbûrenin tesviye-i umûruna vasîyy-i şer‘îsi [33] olmağla vesâyeten muhzır Ahmed Efendi [b.] Abdi el-İmâm mahzarında ikrâr ve takrîr-i kelâm edip merhûm-ı merkūmun nukūd ve menkūlünden mahalle-i mezbûrede vâki‘ bir tarafı Mâhi bt. Abdullah nâm Hâtun ile Kalef nâm Yahudi mülkü ve bir tarafı Rahime bt. Ahmed ile mahdûd mülkü ve iki [tarafı] tarîk-i âm ile mahdûd ve mümtâz olan iki bâb tahtânî ocaklı menzili ve iki fevkānî menzil ve menzil-i mezbûra muttasıl bir kıt‘a bağı ve iki bi’r-i mâ’ ve eşcâr[-ı müsmire] ve gayr-ı müsmireyi müştemil olan mülk menzilden gayrı mâl ıtlâk olunur şeyi olmayıp sagīr[e]-i mezbûrenin nafaka ve kisvesi için menzil-i mezbûrun bey‘i lâzım gelmeğin cânibi şer‘-i kavîmden bey‘ine izin ve icâzet verdikden sonra menzil-i mezbûr sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mutasarrıf olsun dedikde gıbbe’t-tasdîki’l-vicâhî bi’t-taleb ketb olundu. Tahrîren fî evâili Rebî‘ilevvel sene isneyn ve erba‘în ve elf.
Şuhûdü’l-hâl: Mahmud Çelebi [b.] Mehmed serrâc, Mustafa Çelebi [b.] Halil serrâc, Mahmud Çelebi el-Cündî ve gayruhüm.
|