|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 93 Hüküm no: 58 Orijinal metin no: [33-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rahime bt. Ahmed’in evini kızı Âişe Hâtun’a hibe ettiği
Havâss-ı aliyye kazâsına tâbi‘ Hasköy mahallâtından el-Hâc Şaban [mahallesinde] sâkine Rahime bt. Ahmed nâm hâtun tarafından husûs-ı âti’l-beyânı ikrâra vekîl olup mezbûreyi [ilm-i] şer‘î ile ârifân Ahmed b. Abdi ve İsa Bey b. Şaban nâm kimesneler şehâdetleriyle vekâleti sâbite olan Mehmed Bey [b.] Ahmed el-Cündî mahfil-i kazâda işbu râfi‘atü’l-kitâb müvekkile-i mezbûrenin sadriye kebîre kızı işbu râfi‘atü’l-kitâb Âişe nâm hâtun tarafından kezâlik tasdîke vekîl olan zevci Mahmud Çelebi b. Mehmed mahzarında ikrâr ve i‘tirâf edip müvekkile-i mezbûrenin silk-i mülkünde münselik olup mahalle-i mezbûrede vâki‘ bir tarafı Mehmed mülkü ve bir tarafı Emetullah? mülkü ve iki tarafı tarîk-i âm ile mahdûd ve mümtâz olup bir bâb fevkānî ve üç bâb tahtânî menzilini ve iki bi’r-i mâ’ı ve eşcâr-ı müsmire ve gayr-ı müsmiresiyle müştemil olan cümle tevâbi‘ ve levâhıkı ile kızı mezbûre Âişe Hâtun’a hibe-i sahîha-i şer‘î ile hibe ve temlîk ol dahi vech-i muharrer üzre meclis-i hibede menzil-i [34] mezbûru ittihâb ve kabûl ve temellük ve tesellüm eyledi ba‘de’l-yevm menzil-i mezbûr merkūme Âişe’nin mülk-i mevhûbudur, keyfe mâ teşâ ve tahtâr mutasarrıfa olsun dedikden sonra müvekkile-i mezbûre Rahime Hâtun merkūme Âişe yedinden bir yeşil zümrüd küpe ıvaz aldı dedikde mukırr-ı merkūmu bi’l-vekâle ikrâr-ı meşrûhunda vekîl-i mezbûr Mahmud Çelebi ve dahi vicâhen tasdîk edicek mâ hüve’l-vâki‘ bi’t-taleb ketb olundu. Tahrîren fî evâili Cumâdelûlâ sene isneyn ve erba‘în ve elf.
Şuhûdü’l-hâl: Mahmud Çelebi [b.] Mirza el-Cündî, Hüseyin Bey b. Mehmed serrâc, Ali Beşe [b.] Abdullah er-Râcil, Mehmed Bey [b.] Abdullah el-Cündî, Ahmed Çelebi [b.] Muslu
|