|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 94 Hüküm no: 59 Orijinal metin no: [34-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Çelebi b. Mehmed’in zevcesi Rahime Hâtun bt. Ahmed’e vekâleten Saliha bt. Ahmed’in evini satın aldığı
Havâss-ı aliyye kazâsına tâbi‘ Hasköy mahallâtından el-Hâc Şaban mahalle[sinde] sâkine Saliha bt. Ahmed nâm hâtun tarafından husûs-ı âti’l-beyânı bey‘a vekîl olup mezbûreyi ma‘rifet-i şer‘le ârifân olan Ahmed Efendi b. Abdi ve Abdi Bey b. Şaban şehâdetleri ile şer‘an vekâleti sâbite olan Mehmed Bey b. Ahmed el-Cündî mahfil-i kazâda işbu râfi‘atü’l-kitâb Rahime bt. Ahmed nâm Hâtun tarafından ikrâr-ı âti’l-beyânı tasdîke mezbûreyi ma‘rifet-i şer‘le ârifân Mustafa Çelebi b. Halil ve Mahmud Bey b. Mirza şehâdetleri ile sâbitü’l-vekâle vekîl olan zevci Mahmud Çelebi [b.] Mehmed mahzarında bi’l-vekâle ikrâr ve takrîr-i kelâm edip müvekkilem mezbûrenin silk-i mülkünde muntazam olup mahalle-i mezbûrede vâki‘ bir tarafı Mehmed mülkü ve bir tarafı Ahmed Efendi ve bir tarafı tarîk-i âm ve bir [tarafı] bâyi‘a-i mezbûre mülkü ile mahdûd ve mümtâz olup iki bâb tahtânî odayı ve muhavvatayı ve eşcâr-ı müsmire ve gayr-ı müsmireyi müştemil olan mülk menzilini merkūme Rahime Hâtun’a nakd-i râyic fi’l-vakt bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledi ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan [menzil] merkūme [Rahime] Hâtun’un mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmu bi’l-muvâ[cehe] bi’l-vekâle ikrâr-ı meşrûhunda vekîl-i mezbûr Mahmud vicâhen tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilevvel sene isneyn ve erba‘în ve elf.
Şuhûdü’l-hâl: ( ) Mehmed serrâc, Ali Beşe [b.] Ahmed er-Râcil, Serbölük Abdullah el-Cündî, Ahmed Çelebi [b.] Muslu, el-Hâc Ramazan [b.] Mahmud
|