.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 95
Hüküm no: 60
Orijinal metin no: [35-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Rahime bt. Ahmed’in zevci Mahmud Çelebi’den mehr-i müecceli olan altı bin akçeyi aldığı

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Rahime bt. Ahmed [nâm] hâtun tarafından husûs-ı âti’l-beyânı ikrâra vekîl olup mezbû[r]u ma‘rifet-i şer‘le ârifân olan Ahmed Efendi [b.] Abdi ve Abdi Bey b. Şaban şehâdetleri ile vekâleti sâbite olan Mehmed Bey [b.] Ahmed el-Cündî mahfil-i kazâda işbu râfi‘ü’l-kitâb Mahmud Çelebi b. Mehmed nâm serrâc-ı hâssa mahzarında bi’l-vekâle ikrâr ve takrîr-i kelâm edip mezbûr Mahmud Çelebi müvekkilem merkūmenin zevci olup mehr-i müeccelinden zimmetinde olan altı bin akçeyi mezbûr Mahmud Çelebi yedinden bi’t-tamâm ahz u kabz eyledi dedikde mukırr-ı merkūmu ( ) bi’l-vekâle ikrâ[r]-ı meşrûhunda mezbûr Mahmud Çelebi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilevvel sene isneyn ve erba‘în ve elf.


Şuhûdü’l-hâl: Mahmud Bey b. Mirza el-Cündî, Hüseyin Bey [b.] Mehmed serrâc, Ali Beşe [b.] Ahmed er-Râcil, Mehmed Bey [b.] Abdullah, Ahmed Çelebi [b.] Muslu