|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 95 Hüküm no: 61 Orijinal metin no: [35-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rahime bt. Ahmed’in Rus asıllı câriyesi Zamâne’yi ölümüne bağlı tasarrufla azat ettiği (müdebber)
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Rahime bt. Ahmed nâm hâtun tarafından ikrâra vekîl olup mezbûreyi ma‘rifet-i şer‘î ile ârifân [olan] Ahmed Efendi ve ..? Şaban şehâdetleriyle vekâleti sâbite [olan] Mehmed Bey b. Ahmed el-Cündî mahfil-i kazâda müvekkilem mezbûrenin câriye-i memlûkesi olan bâ‘isetü’l-kitâb uzun boylu açık kaşlı Rûsiyyetü’l-asl Zamâne bt. Abdullah nâm câriye mahzarında bi’l-vekâle ikrâr ve takrîr-i kelâm edip müvekkilem mezbûre Rahime Hâtun câriye-i memlûkesi olan mevsûfe-i mezkûreyi tedbîr-i mukayyed ile müdebbere edip vefâtımdan kırk gün mukaddem sâir ahrâr-ı asliyyât gibi hürre olsun dedikde mukırr-ı merkūmu bi’l-vekâle ikrâr-ı meşrûhunda mezbûre câriye dahi vicâhen tasdîk edicek mâ hüve’l-vâki‘ bi’t-taleb ketb olundu. Tahrîren [fî] evâhiri Rebî‘ilevvel sene 1042.
Şuhûdü’l-hâl: Mahmud Bey [b.] Mirza el-Cündî, Hüseyin Bey [b.] Mehmed serrâc, Ali Beşe [b.] Ahmed er-Râcil, Mehmed Bey b. Abdullah, Ahmed (…) [Derkenâr] Ve fîhi nazar?
|