|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 96 Hüküm no: 62 Orijinal metin no: [36-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kerime bt. Şaban’ın Yahuda v. Avraham’a evini sattığı
Hazret-i Eyyûb el-Ensârî muzâfâtından Hasköy’de Pîrî Paşa mahallesi sâkinelerinden Kerime bt. Şaban nâm hâtun meclis-i şer‘-i hatîr-i lâzımü’t-tevkīrde işbu Senyore cemâ‘atinden râfi‘-i hâze’s-sifr Yahuda v. Avraham nâm Yahudi muvâcehesinde bi’t-tav‘i’s-sâf ikrâr ve i‘tirâf edip silk-i mülkümde muntazam olup mahalle-i mezbûrede [vâki‘] bir cânibi Mehmed b. Mehmed mülkü ve bir cânibi Fâtıma bt. Ahmed mülkü ve bir cânibi Pîrî Rıdvan mülkü ve bir cânibi tarîk-i âm ile mahdûd olup üç bâb fevkānî odayı ve bir tahta-pûşu ve bir bâb tahtânî odayı ve tûlen otuz sekiz zirâ‘ ve arzan yirmi dokuz zirâ‘ hadîka-i zât-ı eşcâr-ı müsmire ve gayr-ı müsmireyi ve bir su kuyusunu ve sâlifü’z-zikr tahtânî oda altında ayazmayı müştemil olan mülk menzilimi cümle tevâbi‘ ve levâhıkı ile mezbûr Yahuda’ya otuz bin nakd-i râyic fi’l-vakt akçeye bey‘i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve tesellüm ettikden sonra semeni olan meblağ-ı merkūmu mezbûr Yahuda yedinden bi’t-tamâm ve’l-kemâl ahz u kabz eyledim, ba‘de’l-yevm menzil-i merkūm mezbûr Yahuda’nın mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmeyi vech-i meşrûh üzre cârî olan ikrârında müşterî-i mezbûr Yahuda dahi bi’l-muvâcehe [tasdîk edicek mâ hüve’l-vâki‘ bi’t-taleb ketb olundu.] Tahrîren fî evâili Ramazâni’l-mübârek sene isneyn ve erba‘în ve elf.
Şuhûdü’l-hâl: Mahmud Çelebi [b.] Mehmed serrâc, Mahmud Bey [b.] Mirza el-Cündî, Durmuş Bey [b.] Salih el-Cündî, İbrahim el-Cündî, Hüseyin Bey [b.] Mehmed serrâc, Mustafa Bey [b.] Mehmed serrâc, Mustafa Çelebi [b.] Halil serrâc, Hasan Efendi [b.] Ahmed, Süleyman Efendi [b.] Mirza, Davud [b.] İbrahim, Ali Beşe [b.] Abdullah, Osman Beşe [b.] Mehmed er-Râcil ve gayruhüm
|