|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 96 Hüküm no: 63 Orijinal metin no: [37-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Bey ile kardeşi Mehmed Bey’e babaları Avraham tarafından hibe edilen evin talepleri üzerine taksim edilmesi
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin Ahmed Bey b. Abdullah ve karındaşı Mehmed Bey nâm kimesneler meclis-i şer‘-i şerîf-i lâzımü’t-teşrîfde her biri takrîr-i kelâm edip mahalle-i mezbûrede vâki‘ bir tarafı merhûm Ganîzâde Efendi bahçesi ve bir tarafı David oğlu Yahuda mülkü ve bir tarafı tarîk-i âm ve bir tarafı zimmî mezârı ile mahdûd olup beş bâb tahtânî ve iki bâb ahırı ve iki bi’r-i mâ’ı müştemil olan menzil bundan akdem babamız olan Avraham nâm Yahudinin mülkü olup ikimiz[e] ale’l-iştirâki’s-seviy hibe eylemeğin hâlen taksîm ve ifrâz murâd eyleriz cânib-i şer‘-i şerîfden üzerine varılıp menzil-i mezbûr taksîm ve ta‘yîn ve her birimizin hissesi tavzîh ve tebeyyün olunmak taleb ederiz dediklerinde cânib-i şer‘den bizzat bu hâssa mi‘mârlardan Üstâd Kara Mehmed b. Abdullah ve zeyl-i kitâbda mastûrü’l-esâmi olan bî-garaz müslimîn ile menzil-i mezbûra varılıp mesâha olundukdan sonra sekiz zirâ‘ arsa üzerinde olan sâlifü’z-zikr üç bâb tahtânî odayı ve bir bi’r-i mâ’ı ve bir bâb ahırı ve tûlen elli beş zirâ‘ ve arzan otuz beş zirâ‘ hadîka mezârlık tarafıdır mezbûr Ahmed Bey karındaşı Mehmed Bey rızâsıyla kabûl ve kabz edip ve sekiz zirâ‘ arsa üzerinde olan sâlifü’z-zikr iki bâb odayı ve bir bâb ahırı ve bi’r-i mâ’ı ve tûlen otuz üç zirâ‘ hadîka ile merkūm David oğlu mülkü tarafıdır mezbûr Mehmed Bey karındaşı Ahmed Bey rızâsıyla kabûl ve kabz edicek mâ hüve’l-vâki‘ bi’t-taleb ketb olundu. Tahrîren fî evâsıtı Muharremi’l-harâm sene selâse ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mahmud Bey b. Pîrî en-neccâr?, Mehmed Bey b. Ahmed el-Cündî, Ömer Bey b. Mustafa es-Serrâc, Mustafa Çelebi b. Halil, Mehmed Halîfe b. İbrahim el-Müezzin, Durmuş Bey b. Salih el-Cündî ve gayruhüm
|