.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 98
Hüküm no: 66
Orijinal metin no: [38-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Çelebi b. Halil’in evini zevcesi Saliha bt. Abdullah’a sattığı

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Mustafa Çelebi b. Halil nâm serrâc-ı hâssa meclis-i şer‘-i hatîr-i lâzımü’t-tevkīrde zevcesi Saliha bt. Abdullah nâm hâtun tarafından husûs-ı âti’l-beyânı tasdîke vekîl olup mezbûreyi ma‘rifet-i şer‘le ârifân olan Ali Beşe b. Ahmed ve Ali Beşe b. Hasan nâm kimesne[ler] şehâdetleri ile vekâleti sâbite olan Ahmed Efendi [b.] Abdi el-İmâm mahzarında bi’t-tav‘i’s-sâf ikrâr ve takrîr-i kelâm [edip] mahalle-i mezbûrede [v]âki‘ bir tarafı Ali Beşe b. Çalık mâlları ve bir tarafı Saliha bt. Rıdvan mülkü ve bir tarafı Ali Beşe b. Hasan mülkü ve bir tarafı tarîk-i âm ile mahdûd ve mümtâz olan bir bâb tahtânî odayı ve bir bâb sofayı ve kenîfi ve eşcâr-ı müsmire ve gayr-ı müsmireyi müştemil olan mülk menzilimi zevcem mezbûr[e] Saliha’ya nakd-i râyic fi’l-vakt dört bin? [akçeye] bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan menzil mezbûre Saliha’nın mülk-i müşterâsıdır [39] keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu vekîl-i merkūm dahi bi’l-muvâcehe [tasdîk edicek mâ hüve’l-vâki‘ bi’t-taleb ketb olundu]. Tahrîren fî evâili Şevvâli’l-mükerrem sene selâsin ve erba‘în ve elf.


Şuhûdü’l-hâl: Mahmud Çelebi [b.] Mehmed serrâc, Mustafa [b.] Mehmed Çelebi el-İmâm, Mehmed b. İbrahim el-Müezzin, Musa b. Ömer, Ahmed Çelebi [b.] Muslu, Hasan b. Uğurlu el-Müezzin, Ahmed b. Hızır, Hüseyin Sofu el-Müezzin, Abdi Bey [b.] Şaban serrâc, Ali [b.] Abdullah