|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 98 Hüküm no: 67 Orijinal metin no: [39-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. İbrahim’in mülk bağını Mustafa Usta b. Ali’ye sattığı
Dârü’s-saltanati’s-seniyye Kostantıniyyetü’l-mahmiyye mahallâtından Gül Câmi‘i mahallesinde sâkine Fâtıma bt. İbrahim [nâm] hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb fahrü’l-akrân Mustafa Usta b. Ali mahzarında ikrâr ve takrîr-i kelâm [edip] kazâ-i Havâss-ı aliyye muzâfâtından Hasköy’e tâbi‘ Kağıthâne nâm karyede vâki‘ bir tarafı Kara Hasan? veresesi bağı ve bir tarafı Arustosyani bağı ve bir tarafı Mihal v. Yani bağı ve bir tarafı tarîk-i âm ile mahdûd ve mümtâz olan bir kıt‘a mülk bağımı bi-cümleti’l-hudûd müşârun-ileyh Mustafa Usta’ya nakd-i râyic fi’l-vakt on iki akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan bağ mezbû[r] Mustafa Usta’nın mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i mezbûrenin ikrâr-ı meşrûhunu el-mukarru lehü’l-mezbûr Mustafa Usta bi’l-muvâcehe [tasdîk edicek mâ hüve’l-vâki‘ bi’t-taleb ketb olundu.] Tahrîren fî evâhiri Ramazâni’l-mübârek li sene selâse ve erba‘în ve elf.
Şuhûdü’l-hâl: Şaban Efendi b. Abdülganî el-İmâm bi-mahalle-i Tahta Minâre, el-Hâc Mustafa b. Abdurrahman el-Müezzin, Câbi? Hamza, Süleyman [b.] Abdullah, Osman Çavuş, Hüseyin Beşe [b.] Abdullah, Yusuf b. Karagöz ve gayruhüm
|