|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 99 Hüküm no: 68 Orijinal metin no: [40-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Borçlu olarak vefat eden Hüseyin Çelebi b. İbrahim’in borcu için evinin vârisleri tarafından müzâyede ile Hüseyin Bey b. Mehmed’e satıldığı
Mahmiye-i İstanbul’da vâki‘ Harâcî mahallesinde sâkin iken fevt olan Hüseyin Çelebi b. İbrahim nâm kimesnenin verâseti zevce-i metrûkesi Âişe bt. Mehmed ve sadriye kebîre kızı Fâtıma ve sagīr oğlu Ahmed’e münhasıra olduğu şer‘an mütehakkik oldukdan sonra mezbûre Fâtıma asâleten ve mezbûre Âişe kendi tarafından asâleten ve sagīr-i mezbûrun tesviye-i umûruna vasîyy-i muhtârı olmağla vesâyeten mahfil-i kazâda işbu râfi‘ü’l-kitâb Hüseyin Bey b. Mehmed nâm serrâc-ı hâssa mahzarında her biri ikrâr ve takrîr-i kelâm edip merkūm-ı mezbûr medyûnen vefât edip nukūd ve menkūlünden Havâss-ı aliyye kazâsına tâbi‘ Hasköy mahallâtından Turşucu mahallesinde vâki‘ bir tarafı Turşucuzâde Hüseyin Çelebi odalarına ve bir tarafı tarîk-i âm ile mahdûd olup bir kıt‘a bahçe ve bir bâb tahtânî ve fevkānî odayı müştemil olan mülk menzilden gayrı deyne vefâ eder mâlı olmayıp deyn-i müsbeti için mârrü’z-zikr bir kıt‘a bahçenin ve menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra mârrü’z-zikr bir kıt‘a bahçe ve menzil-i mezbûru …? sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mezbûr Hüseyin Bey üzerinde yirmi iki bin nakd-i râyic fi’[l]-vakt akçede karâr edip ve ziyâde ile tâlib-i âhar zuhûr etmemeğin menzil-i mezbûru asâleten ve vesâyeten merkūm Hüseyin Bey’e zarûret-i deyn-i ma‘rûfü’l-mikdâr yirmi [iki bin] akçeye bey‘-i kat‘île bey‘ edip ol dahi vech-i mübeyyen üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eyledim dediklerinde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri Şevvâli’l-mükerrem li sene selâsin ve erba‘în ve elf.
Şuhûdü’l-hâl: Mehmed Efendi el-mütevellî, Mehmed Halîfe [b.] Haydar el-Müezzin, İbrahim Çelebi [b.] Hüsrev el-İmâm, Mustafa el-İmâm, Mehmed Çelebi, Mustafa Beşe [b.] Halil, Mehmed b. Mehmed el-Müezzin, Mehmed b. Rıdvan, Abdünnebi Çelebi, Mahmud b. Ahmed, Mehmed b. İbrahim el-Müezzin, Osman b. Abdullah er-Râcil, Mehmed b. Bilal, Mehmed Bey el-Fenârî, İbrahim [b.] Mehmed ve gayruhüm
|