|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 100 Hüküm no: 69 Orijinal metin no: [41-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed b. İlyas’ın iki oda ile arsayı zevcesi Canfeda bt. Abdullah’a sattığı
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinden Ahmed b. İlyas nâm kimesne meclis-i [şer‘-i hatîr-i] lâzımü’t-tevkīrde hâlen zevcesi olan Canfeda bt. Abdullah nâm hâtun tarafından husûs-ı âti’l-beyânı tasdîke vekîl olup mezbûreyi ma‘rifet-i şer‘le ârifân olan Ali Beşe b. Hasan ve Hasan Halîfe b. Uğurlu nâm kimesneler şehâdetleri ile vekâleti sâbite olan Mustafa Çelebi b. Halil [nâm] serrâc-ı hâssa mahzarında ikrâ[r] ve takrîr-i kelâm edip karye-i ( ) silk-i mülkümd[e] münselik olup mahalle-i mezbûr[e]de vâki‘ bir tarafı kendi mülküme muttasıl ve bir tarafı Ali Beşe mülküne ve bir tarafı Sâime bt. Rıdvan mülküne ve bir tarafı [tarîk-i] âm ile mahdûd ve mümtâz olan iki bâb tahtânî odayı ve tûlen on dört ve arzan yedi zirâ‘ arz-ı hâliyemi zevcem mezbûreye nakid üç bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan oda zevcem mezbûrenin mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmu ikrâr-ı meşrûhunda vekîl-i merkūm dahi bi’l-muvâcehe tasdîk [ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu.] Tahrîren fî evâhiri Şevvâli’l-mükerrem sene selâsin ve erba‘în ve elf.
Şuhûdü’l-hâl: Mahmud Çelebi [b.] Mehmed serrâc, Ahmed Efendi [b.] Abdi el-İmâm, el-Hâc Abdullah, Veys [b.] Abd… el-Müezzi[n], Ali Beşe [b.] Ahmed er-Râcil, …? Hüseyin Sofu el-Müezzin, Ahmed Çelebi [b.] Muslu, Abdi Bey [b.] Şaban serrâc, Ali Beşe [b.] Hüseyin ve gayruhüm
|