.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 101
Hüküm no: 71
Orijinal metin no: [42-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Abdi Beşe b. Mustafa ile kardeşlerine ait bağın Hüseyin Bey b. Mehmed’e satıldığı

Mahmiye-i İstanbul’da vâki‘ Küçük Langa Bostanı? mahallesi sükkânından Abdi Beşe b. Mustafa ve li ebeveyn karındaşı Mehmed ve kız karındaşı Âişe nâm hâtun tarafından vekîl olup mezbûreyi ma‘rifet-i şer‘î ile ârifân olan Süleyman Efendi b. Mirza ve Mehmed Beşe b. Keyvan nâm kimesne şehâdetleri ile vekâleti sâbite olan mezbûr Abdi Beşe meclis-i şer‘-i hatîr-i [lâzımü]’t-tevkīrde işbu râfi‘ü’l-kitâb hâssa serrâclardan Hüseyin Bey b. Mehmed nâm kimesne mahzarında her biri ikrâr-ı tâm ve takrîr-i kelâm edip Havâss-ı aliyye kazâsına tâbi‘ Hasköy mahallâtından Abdüsselam mahallesinde vâki‘ bir tarafı Yusuf Efendi bağı ve bir tarafı Ali Çelebi b. ( ) bağı ve bir tarafı Dimitri v. Kosta bağı ve bir tarafı tarîk-i âm ile mahdûd ve mümtâz olan bir kıt‘a mülk bağımızı asâleten [ve] vekâleten merkūm Hüseyin Bey’e otuz iki bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eylediğimde ol dahi vech-i mübeyyen üzre iştirâ ve tesellüm eyledi ba‘de’l-yevm zikr olunan bir kıt‘a bağ merkūm Hüseyin Bey’in mülk-i müşterâsıdır keyfemâ yeşâ ve yehtâr mutasarrıf olsun dediklerinde mukırrân-ı merkūmânın asâleten [ve] vekâleten ikrâr-ı meşrûhunu el-mukarru lehü’l-mezbûr Hüseyin Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘deti’ş-şerîfe sene selâsin ve erba‘în ve elf.


Şuhûdü’l-hâl: Mehmed b. Bilal, Mehmed b. Abdullah, Ali b. Selman, Ali b. Abdullah, Receb Beşe b. Mustafa er-Râcil, Mustafa Beşe b. Şaban, Hüseyin Bey b. Bâli, Selman [b.] Osman, Mahmud b. Ahmed ve gayruhüm