|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 102 Hüküm no: 72 Orijinal metin no: [42-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Mehmed b. Hasan’ın evinin vârisleri tarafından Mustafa b. Abdullah ile zevcesi Fâtıma bt. Mustafa’ya satıldığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken vefât eden Mehmed b. Hasan nâm kimesnenin verâseti zevce-i metrûkesi Mercan bt. Veli nâm hâtuna ve li ebeveyn kız karındaşları Selçuk’a ve Selime’ye ve usûbeten vârisi Habîb b. Ramazan nâm kimesneye münhasıra olduğu şer‘an mütehakkik oldukdan sonra [43] mezbûre Mercan asâleten ve mezbûr Habîb dahi asâleten ve mezbûre Selçuk ve Selime tarafından bey‘-i âti’l-beyânı ikrâra vekîl olup mezbûreyi ma‘rifet-i şer‘î ile ârifân olan Bünyad? Yazıcı b. Hamz[a] ve Osman [b.] Abdi nâm kimesneler şehâdetleri ile vekâleti sâbite olan Mustafa b. Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa b. Abdullah ve zevcesi Fâtıma bt. Mustafa nâm hâtun mahzarında her biri ikrâr ve takrîr-i kelâm edip müteveffâ-yı merkūmun muhallefâtından olup mahalle-i mezbûrede vâki‘ bir tarafı Emine bt. Mehmed mülküne ve bir [tarafı] Ali Paşa mülküne ve bir tarafı Mahmud Ağa mülküne ve bir tarafı Hasan b. Abdullah mülküne muttasıl olup iki bâb tahtânî büyûtu ve kenîfi müştemil olan mülk menzili mezbûrân Mustafa ve Fâtıma’ya nakd-i râyic fi’l-vakt üç bin sekiz yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledik ba‘de’l-yevm zikr olunan menzil mezbûrân Mustafa’nın ve Fâtıma’nın mülk-i müşterâlarıdır dediklerinde mukırrûn-u merkūmûnun asâleten ve vesâyeten ikrârlarını el-mukarru lehüma’l-mezbûrân bi’l-muvâcehe tasdîk [ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu.] Tahrîren fî evâsıtı Zilka‘deti’ş-şerîfe sene selâsin ve erba‘în ve elf.
Şuhûdü’l-hâl: İbrahim Bey [b.] Yusuf el-Cündî, Ali Beşe b. Ahmed, Osman Bey [b.] Mustafa serrâc, Hasan b. Abdullah, Ali Beşe [b.] Halil, Mehmed Beşe [b.] Abdullah, Mahmud b. Abdullah, Mustafa [b.] Mehmed, Hüseyin [b.] Abdullah, Mehmed Beşe b. Abdullah
|