.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 102
Hüküm no: 73
Orijinal metin no: [43-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Erhondepole bt. Yasef’in evini Baroh v. Menahim’e sattığı

Havâss-ı aliyye kazâsına tâbi‘ Hasköy nâm karyede sâkine Erhondepole bt. Yasef nâm Yahudiyye meclis-i şer‘-i hatîr-i lâzımü’t-tevkīrde işbu râfi‘ü’l-kitâb oğlu Baroh v. Menahim nâm Yahudi mahzarında ikrâr ve takrîr-i kelâm edip karye-i mezkûre[de] vâki‘ bir tarafı Menahim nâm Yahudi vakfı ve bir tarafı Mercan nâm Yahudi mülkü ve iki [44] tarafı tarîk-i hâs ve âm ile mahdûd ve mümtâz iki beyt-i süflîyi ve bir çardak ve bir matbah ve iki fırın ve bir küçük oda ve iki kenîfi müştemil olup ilâ hîni’l-akd mülk-i mahz olan menzilimi cemî‘ tevâbi‘ ve levâhıkıyla mezbûr Baroh’a kâmil iki yüz riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve kabz ve tesellüm eyledi ba‘de’l-yevm zikr olunan menzil mezbûr Baroh’un mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i mezbûreyi ikrâr-ı meşrûhunda el-mukarru lehü’l-merkūm Baroh bi’l-muvâcehe [tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu.] Tahrîren fî evâhiri Zilka‘deti’ş-şerîfe li sene selâsin ve erba‘în ve elf.


Şuhûdü’l-hâl: Kurd v. Mosi, Almando v. Samon, Menahim v. Hanka, Mihal v. Menahim, İlya v. Kalef