.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 103
Hüküm no: 75
Orijinal metin no: [44-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kokona’nın anne ve babasından kalan miras hissesini kırk beş bin akçe karşılığı kardeşi Mihal’e devrettiği

Havâss-ı aliyye kazâsı muzâfâtından Hasköy nâm karye sâkinlerinden iken bundan akdem mürd olan Yani v. Nahal’in zevcesi Dosine bt. ( ) nâm Nasrâniyyenin verâseti bi-hasebi’l-irsi’ş-şer‘î [45] sulbî kebîr oğlu Mihal ve sadriye kebîre kızı Kokona’ya münhasıra olduğu şer‘an mütehakkik oldukdan sonra mezbûre Kokona meclis-i şer‘de li ebeveyn karındaşı işbu hâmilü’l-kitâb mezbûr Mihal muvâcehesinde ikrâr ve takrîr-i kelâm edip babamız hâlik-i mezbûrun ve vâlidemiz hâlike-i mesfûr[e]nin muhallefâtından karye-i mezbûrede bir tarafı lebideryâ ve bir tarafı Arostos v. Yani nâm zimmî mülkü ile ve bir tarafı Angeli v. Mavrodi mülkü ile ve bir tarafı tarîk-i âm ile mahdûd olan mülk menzilden ve Kağıthâne karye bağları dâhilinde vâki‘ lede’l-ahâlî ma‘lûmü’l-hudûd bir kıt‘a bağdan ve sâir menkūlât ve esâs-ı beytden bana isâbet eden sülüs hisse-i şer‘iyyem mukābelesinde karındaşım mezbûr Mihal yedinden kırk beş bin nakd-i fıddî râyic fi’l-vakt akçe ahz u kabz edip husûs-ı mezbûre müte‘allik benden veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırra[-i] mezbûrenin vech-i meşrûh üzre cârî olan ikrâr ve takrîrin el-mukarru lehü’l-mezbûr Mihal bi’l-muvâcehe tasdîk ve [bi’l-müşâfehe tahkīk] etmeğin mâ vaka‘a bi’t-taleb ketb olundu. Tahrîren fi’l-yevmi’s-sâdis mine’l-Muharremi’l-harâm sene erba‘a ve erba‘în ve elf.


Şuhûdü’l-hâl: Mehmed Efendi el-müsta‘id, Ahmed Çelebi [b.] Muslu, Mahmud Çelebi [b.] Mehmed serrâc, Hüseyin Bey b. Mehmed serrâc, Mehmed b. Bilal, Hüseyin Beşe [b.] Abdullah, Hüseyin Çavuş b. Bâli, Abdünnebi b. Ali, Aleks v. Tomori, Dimitri v. Kosta, Arsiye [v.] Dimitri, Kosta v. Dimitri, Nikola v. Andriye, Zaharya [v.] İstekno, Yani v. Yorgi, Papa v. Yani, Arustos Angeli v. Mavrodi