|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 105 Hüküm no: 79 Orijinal metin no: [47-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mâhi bt. Abdullah’ın evlâdı ve kırâat için vakfettiği evinin vakfiyesi
Elhamdü li veliyyihî ve’s-salâtü alâ Nebiyyihî Muhammedin ve âlihî ve ashâbihî ecma‘în ammâ ba‘d. Havâss-ı aliyye kazâsı muzâfâtından Hasköy mahallâtından el-Hâc Şaban mahallesinde sâkine işbu sâhibü’l-hayrât ve’l-hasenât sâhibesi fahrü’l-muhadderât Mâhi bt. Abdullah nâm hâtun meclis-i şer‘-i hatîr-i lâzımü’t-teşrîfde vakf-ı âti’l-beyâna li ecli’t-tescîl mütevellî nasb ettiği Ahmed Efendi [b.] Abdi el-İmâm mahzarında bi’t-tav‘i’s-sâf ikrâr eyledi ki silk-i mülkümde muntazam olup mahalle-i mezkûrede vâki‘ bir cânibi Ahmed Efendi b. Abdi mülkü ve bir cânibi Kalef v. Baroh nâm Yahudi mülkü ve iki cânibi tarîk-i hâs ile mahdûd ve mümtâz olup üç bâb tahtânî oda ve bir sofayı ve bir bi’r-i mâ’ı ve havluyu ve eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘i ve levâhıkı ile hasbeten lillâhi’l-aliyyi’l-azîm ve taleben li merdâti’r-Rabbi’r-rahîm vakf-ı sahîh-i şer‘î ve habs-i sarîh-i mer‘î kılıp şöyle şart eyledim ki hayâtda oldukça menzil-i mezkûrda ben sâkine ve mutasarrıfa olup ba‘de vefâtımdan sonra dâmâdım İbrahim b. Arslan nâm kimesne sâkin olup ba‘de vefâtihî mezbûr İbrahim’in oğlu işbu hâzır bi’l-meclis olan Yusuf nâm sâkin ve mutasarrıf olup ba‘de vefâtihî mezbûr İbrahim’in zevcesi Safiye bt. Abdullah nâm hâtun sâkine ve mutasarrıfa olup ve ba‘de vefâtihâ mezbûrân İbrahim’in ve Safiye’nin evlâdlarına batnen ba‘de batnin neslen ve ba‘de neslin sâkinler olup mezbûrûnun süknâya ihtiyâçları yok ise îcâr edip icâresin alalar ba‘de’l-inkırâz [48] el-iyâzü billâh min kahri’l-feyyâz menzil-i mezkûr ecr-i misli ile hâsıl olan icâresini mahalle-i mezbûre avârızına -in uhtîce- ve illâ mahalle-i mezkûrede her kim imâm olursa âna verilip ol dahi mukābelesinde her gün üç İhlâs-ı şerîf tilâvet edip sevâbını benim rûhuma hibe eyleye deyû menzil-i mezkûru ba‘de’t-..? tahliyeti’ş-şer‘iyye mütevellî-i merkūma teslîm ol dahi tesellüm edip sâir evkāf mütevellîleri gibi tasarruf eyledi dedikde, vâkıfe-i mezbûre zimâm-ı kelâmını makām-ı âharda atf edip vakf-ı akār muktedâ-yı e’imme-i kibâr olan İmâm-ı A‘zam ve hümâm-ı efham re’y-i şerîfleri üzre gerçi teslîm makbûldür velâkin anın katında lüzûmu îcâb eylemez zimâm-ı tâm deyû vakfından rücû‘ ve mütevellîden istirdâda şürû‘ eyledikde mütevellî-i mezbûr da cevâb verip gerçi hâl bast olunan minvâl üzredir imâmeyn-i hümâmeyn kavl-i şerîfleri üzre sıhhat lüzûmdan müfârekat eyle[me]yip vakıf sahîh olıcak lâzım dahi olur buyurmuşlardır deyû akār-ı mezkûru teslîmden imtinâ‘ ve husûmet ve nizâ‘ edip vâkıfe-i mezbûre ile hâkim-i nâfizü’l-ahkâma murâfa‘a olup hüküm taleb eylediklerinde hâkim-i müşârun-ileyh dahi cânib-i vakfı evlâ görüp imâmeyn-i hümâmeyn kavl-i şerîfleri üzre evvelâ sıhhat-i vakfa ve sâniyen lüzûma hükmeyleyip mahkûm olmağla min ba‘d nakz-ı nakzına mecâl ve mahal ve tebdîl ve tağyîr mümteni‘ü’l-ihtimâl oldu -fe-men beddelehû ba‘de mâ semi‘ahû fe-innemâ ismuhû alellezîne yübeddilûnehû innallâhe semî‘un alîm ve ecrü’l-vâkıfı ale’l-cevâdi’l-kerîm-. Cerâ zâlike ve hurrire fî evâhiri Rebî‘ilevvel sene erba‘a ve erba‘în ve elf.
Şuhûdü’l-hâl: Hüseyin Sofu el-Müezzin, Hasan b. Uğurlu, Ali b. Hüseyin, Süleyman [b.] Ali, Mahmud Çelebi b. Mehmed serrâc, Mustafa Çelebi [b.] Halil serrâc, Ahmed b. Abdülcebbâr, Ali Beşe [b.] Abdullah, Ahmed Çelebi [b.] Muslu ve gayruhüm
|