.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 108
Hüküm no: 83
Orijinal metin no: [50-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Servan v. Pirhos’un Eğin’deki bağını Arzhan v. Gazal’a sattığı

Vilâyet-i Anadolu’da vâki‘ Eğin kazâsına tâbi‘ Gemürgâp nâm karye sükkânından Servan v. Pirhos nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Arzhan v. Gazal nâm zimmî mahzarında ikrâr ve takrîr-i kelâm edip [51] karye-i mezbûrede vâki‘ bir tarafı Marderos v. Avanes mülkü ve bir tarafı müşterî-i mezbûr mülkü ve iki tarafı tarîk-i âm ile mahdûd ve mümtâz olan bir kıt‘a mülk bağımı ve kurbunda cârî olan mâ’dan hakk-ı mecrâsıyla mezbûr Arzhan’a kâmil otuz beş riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledi ba‘de’l-yevm zikr olunan bir kıt‘a bağ mezbûr Arzhan’ın mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Arzhan bi’l-muvâcehe [tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu.] Tahrîren fî evâili Recebi’l-mürecceb sene erba‘a ve erba‘în ve elf. Şuhûd[ü’l-hâl]: ( )