.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 109
Hüküm no: 84
Orijinal metin no: [51-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Arisenos v. Yani’nin arsa, mahzen ve dükkânını Kokona bt. Yani’ye sattığı

Havâss-ı aliyye kazâsına tâbi‘ Hasköy’de sâkin Arisnos v. Yani nâm zimmî meclis-i şer‘-i hatîr-i lâzımü’t-tevkīrde işbu râfi‘atü’l-kitâb Kokona bt. Yani nâm zimmîyye mahzarında bi’t-tav‘i’s-sâf ikrâr [ve] i‘tirâf edip mahalle-i mezbûrede vâki‘ iki tarafı bâyi‘-i mezbûr mülkü ve bir tarafı Kadri Çavuş mülkü ve bir tarafı tarîk-i âm ile mahdûd ve mümtâz ve tûlen yirmi buçuk ve arzan tarîk-i âm tarafı beş buçuk zirâ‘ mülk arz-ı hâliyemi ve mahdûd-ı mezbûr dâhilind[e] bir bâb tahtânî mahzenimi ve bir bâb dükkânımı mezbûre Kokona’ya yirmi beş bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan arz-ı hâliye mezbûre Kokona’nın mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre Kokona bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. [52] Tahrîren fî evâsıtı Ramazâni’l-mübârek li sene erba‘a ve erba‘în ve elf.


Şuhûdü’l-hâl: Ahmed Ağa b. Abdullah, Mehmed Çelebi b. Ahmed el-Cündî, Hüseyin Çavuş b. Bâli, Mehmed Çelebi b. Mustafa el-İmâm, Mehmed b. İbrahim el-Müezzin, Mahmud Çelebi b. Mehmed serrâc, Mehmed Beşe b. Hasan er-Râcil, Mustafa Çelebi [b.] Veli er-Râcil, Hasan b. Pîrî, Baba Yani v. Dimitri, Angeli v. Mavrodi, Dimitri v. Kosta, Hristo v. Dimitri, Yamandi v. Nikola, Nikola v. Andreye, Tahderiye? v. İstofo ve gayruhüm