|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 109 Hüküm no: 85 Orijinal metin no: [52-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mihal v. Filodi’nin Kane bt. Maksimon adlı câriyesini azat ettiği
Mahmiye-i İstanbul hısnı ebvâbından Balat kapısı kurbunda Karakaş mahallesinde sâkin Dimetoka cemâ‘atinden Mihal v. Filodi nâm Yahudi meclis-i şer‘-i hatîr-i lâzımü’t-tevkīrde silk-i mülkünde münselik olan orta boylu açık kaşlı gök gözlü çenesinin sağ tarafında haçı? olan Koroniyyetü’l-asl Kane bt. Maksimon nâm câriye-i memlûkesinin muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î edip câriye-i memlûkem olan mevsûfe-i mezkûreyi niyyet-i hâlisa-i vâfire ve taviyye-i tayyibe-i sâfiye ile hasbeten lillâhi’l-hallâk tahrîr ve i‘tâk ve mülkümden âzâd ve ihrâc ve sâir ahrâr-ı asliyyîne indirâc eyledim ba‘de’l-yevm mezbûre Kane sâir ahrâr-ı asliyyîn gibi hürre olup sâir mevâlî için şer‘an sâbit olan [53] hakk-ı velâdan gayrı hakkım kalmadı dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâsıtı Muharremi’l-harâm sene hamsîn ve erba‘în ve elf.
Şuhûdü’l-hâl: İsmail Halîfe b. Mehmed el-İmâm, el-Hâc Mustafa b. Abdullah, Memi b. İsmail el-Müezzin, Ali Dede [b.] Mehmed, Yanaki v. Dotos, İstodri v. Estar, Kosta v. Maseri ve gayruhüm
|