.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 111
Hüküm no: 87
Orijinal metin no: [54-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


David v. Avraham’ın evini bir miktar eşya ile birlikte oğulları Nesimi, Yasef, Menahim ve İsak’a hisseleri eşit olacak şekilde hibe ettiği

Havâss-ı aliyye kazâsına tâbi‘ Hasköy sükkânından olup Kadiz cemâ‘atinden David v. Avraham nâm Yahudi meclis-i şer‘-i hatîr-i lâzımü’t-tevkīrde sulbî kebîr oğulları Nesimi ve Yasef ve Menahim ve İsak nâm Yahudiler mahzarında bi’t-tav‘i’s-sâf ikrâr ve takrîr-i kelâm edip silk-i mülkünde muntazam olup karye-i mezbûrede vâki‘ bir tarafı tarîk-i âm ile Aynacılar demekle ma‘rûf Mosi v. Avraham nâm Yahudi mülkü ve bir tarafı tarîk-i âmdır ki Karâyî cemâ‘ati tarafıdır ve bir tarafı Yakob v. ( ) mülkü ve bir tarafı tarîk-i âm ile mahdûd ve mümtâz olup yedi bâb tahtânî menzil ve üç bâb matbahı ve dört bâb mahzeni ve bir bâb bodrumu ve bir bâb hamamı câmekânı ile ve dört bi’r-i mâ’ı ve bir sofayı ve altı bâb kenîfi ve menzil-i mezbûrun dâhilinde üç kıt‘a bahçeyi ve yedi bâb fevkānî menzili ve üç tahta bendi ve bir bâb matbahı ve üç bâb kenîfi dört bâb muhavvatayı müştemil olup mülk menzili ba‘de’t-tahliyeti’ş-şer‘iyye ve on aded kazanı ve yirmi aded kalay tepsisini ve dört aded güğümü ve iki kahve ibriği ve iki el ibriği ve beş aded döşeği ve otuz aded yastığı ve yirmi aded yorganı ve yirmi aded kebeyi ve iki demir siniyi ve menzil-i mezbûrun içinde mâl ıtlâk olunur eşyânın cemî‘sini mezbûrûn Nesimi ve Menahim ve Yasef ve İsak’a alâ tarîki’s-seviyye [55] hibe-i sahîha-i şer‘î ile hibe ve temlîk ve teslîm edip onlar dahi vech-i muharrer üzre meclis-i hibede menzil-i mezbûru ve eşyâ-i mezkûru kabûl ve ittihâb ve kabz ve temellük ve tesellüm eylediler ba‘de’l-yevm menzil-i mezbûr ve eşyâ-i mezkûr merkūm Nesimi’nin ve Menahim’in ve İsak’ın ve Yasef’in mülk-i mevhûblarıdır keyfemâ yeşâ’ûn ve yehtârûn mutasarrıfûn olsunlar dedikde mukırr-ı merkūmun ikrâr-ı meşrûhunu el-mukarru lehümü’l-mezbûrûn Yahudiler bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Saferi’l-hayr sene hamsîn ve erba‘în ve elf.


Şuhûdü’l-hâl: Mahmud Çelebi [b.] Mehmed serrâc, Mehmed b. Mustafa el-İmâm, el-Hâc Behmen [b.] Abdullah, Yusuf b. Abdullah, Mehmed b. İbrahim el-Müezzin, Ali b. Abdullah, Mehmed b. Halil, Oruc hammâl, Veli hammâl