|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 114 Hüküm no: 91 Orijinal metin no: [58-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Borçlu olarak vefat eden İbrahim Çelebi b. Ömer’in borcu için evinin müzâyede ile Fâtıma bt. Mustafa’ya satıldığı
Havâss-ı aliyye kazâsı muzâfâtından Hasköy’e tâbi‘ Kağıthâne nâm karyede sâkin iken fevt olan İbrahim Çelebi b. Ömer nâm kimesnenin verâseti zevce-i metrûkesi Fâtıma bt. Mustafa’ya ve sadrî sagīr oğlu Mehmed’e ve sadriye sagīre kızı Âişe’ye ve Sâime’ye münhasıra olduğu şer‘an mütehakkik oldukdan sonra sagīr-i mezbûrların tesviye-i umûrlarına savb-ı şer‘îden mansûb vasî olan Mehmed Çelebi b. Ömer nâm kimesne mahfil-i kazâda işbu râfi‘atü’l-kitâb Fâtıma nâm hâtun mahzarında ikrâr ve takrîr-i kelâm edip merhûm-ı merkūm medyûnen vefât edip nukūd ve menkūlünden karye-i mezbûrede vâki‘ iki tarafı Mahmud Ağa mülkü ve bir tarafı Mehmed Çelebi mülkü ve bir tarafı tarîk-i âm ile mahdûd ve mümtâz olan bir bâb fevkānî menzili ve bir bâb ahırı ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilden gayrı deynine vefâ eder mâlı olmayıp yirmi iki bin üç yüz seksen akçe deyn-i müsbeti için menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildikden sonra menzil-i mezbûr sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mezbûre Fâtıma üzerinde on iki bin dört yüz nakd-i râyic fi’l-vakt akçede karâr edip ve ziyâde ile tâlib-i âhar zuhûr etmemeğin menzil-i mezbûru vesâyeten mezbûre Fâtıma’ya zarûret-i deyn-i merkūm için merkūmü’l-mikdâr on iki bin dört yüz akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ eyledi[kde]n sonra kabz-ı semen-i ma‘dûd ve teslîm-i [59] mebî‘-i mahdûd eyledim keyfe mâ teşâ ve tahtâr mutasarrıfa olsun dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâsıtı Cumâdelâhire li sene hamsîn ve erba‘în ve elf.
Şuhûdü’l-hâl: Yusuf Efendi b. Behram el-İmâm, Süleyman Halîfe b. Ali el-Müezzin, Hasan Çelebi b. Mahmud el-Müezzin, Osman b. Ömer, Receb b. Ali, İbrahim Beşe b. Mustafa er-Râcil, Ahmed b. Abdullah, Mehmed b. Sefer
|