.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 116
Hüküm no: 93
Orijinal metin no: [59-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Osman Reis’in câriyesi olduğunu iddia ettiği Emine bt. Süleyman’ın hür olduğunun şahitlerle ispat edildiği

Vilâyet-i Anadolu’da vâki‘ Gönye sancağından Arhavi kazâsına tâbi‘ Hücrevât nâm karye sükkânından Emine bt. Sül[ey]man nâm hâtun Osman Reis b. Hüseyin nâm kimesne mahzarında üzerine takrîr-i da‘vâ edip mezbûr Osman Reis câriye-i memlûkemsin deyû beni câriye edip âhara bey‘ etmek ister suâl olunup yedi kasr olunmak matlûbumdur dedikde gıbbe’s-suâl mezbûr Osman Reis cevâbında merkūme Emine’yi Rize nâm kasabada Feridun nâm kimesneden kırk altı riyâlî guruşa [60] bey‘ edip merkūme mülk-i müşterâm olmağla câriye-i memlûkedir deyip merkūme Emine’nin hürre olmasını münkir olıcak udûl-i müslimînden olup karye-i mezbûre sükkânından Ali b. Mehmed ve Hüseyin Beşe b. Ali er-Râcil li ecli’ş-şehâde meclis-i şer‘a hâzırân olup fi’l-hakīka merkūme Emine karye-i mezbûrede Süleyman nâm kimesnenin sadriye kızıdır anası adı Râziye ve maskat-ı re’si karye-i mezbûredir biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra merkūme Emine’nin hürriyetine hüküm birle mâ hüve’l-vâki‘ bi’t-taleb ketb olundu. Tahrîren fî evâsıtı Cumâdelâhire sene hamsün ve erba‘în ve elf.


Şuhûdü’l-hâl: ( )